ተዘርፈው የነበሩ ጥንታዊ የኢትዮጵያ ቅርሶች ተመለሱ

ከ150 ዐመታት በፊት ከመቅደላ ተዘርፈው የተወሰዱ 13 ታሪካዊና ሃይማኖታዊ ቅርሶች ከለንደን ዛሬ ወደ አዲስ አበባ ተመልሷል።

ቅርሶቹ በግለሰቦች እጅ ላይ የነበሩ እና ለጨረታ ቀርበው ከመሸጣቸው በፊት በለንደን የኢትዮጵያ ኤምባሲ ፣ የኢትዮጵያ ቅርስ አስመላሽ ግብረ ኃይል እና ለኢትዮጵያ ተቆርቃሪ ግለሰቦች ሼሄራዛድ ፋውንዴሽን ከተባለ ድርጅት ጋር በመተባበር እንዲመለሱ የተደረጉ ናቸው።

በለንደን የኢትዮጵያ ኤምባሲ በቀጣይ በግለሰቦች እጅ ከሚገኙ ጥንታዊ የኢትዮጵያ ቅርሶች በተጨማሪ በብሪታኒያ ሙዚየም ውስጥ የሚገኙ 12 ፅላቶችን ለማስመለስ ሥራ እንደተጀመረና በቅርቡም የመመለስ ተስፋ እንዳለ ተናግሯል።

የቱሪዝም ሚኒስቴር ቅርሶቹ ጥበቃ ተደርጎላቸው ለሕዝብ እይታ ይቀርባሉ ብሏል።

እነዚህን ቅርሶች ለኢትዮጵያ ያስረከበው ሼሄራዛድ ፋውንዴሽን ቅርሶቹን ለመግዛት ምን ያህል ወጪ እንዳወጣ እንደማይታወቅ ተነግሯል።

ሰለሞን ሙጬ

ታምራት ዲንሳ