ብዙ ሊነገርለት የሚገባው የጡት ካንሰር

በየዓመቱ በጥቅምት ወር ስለጡት ካንሰር በቂ ግንዛቤ እንዲኖር በዓለም አቀፍ ደረጃ የተለያዩ እንቅስቃሴዎች ይካሄዳሉ። ካንሰር ሲባል ብዙዎች በቶሎ የሚያስቡት የማይድን ህመም ነው የሚለውን ነው። ሆኖም ግን በቂ የህክምና አማራጮች ባሉባቸው ሃገራት ብቻ ሳይሆን ኢትዮጵያ ውስጥ የጡት ካንሰር ህመም አጋጥሟቸው ታክመው የዳኑት ቁጥር ጥቂት አይደለም። የጡት ካንሰር በተለይ በአሁኑ ጊዜ ኢትዮጵያ ውስጥ በብዛት በሰዎች ላይ የሚገኝ የካንሰር አይነት የሆነ መምጣቱን የዘርፉ የህክምና ባለሙያዎች ይናገራሉ። ታማሚዎቹ ለህክምና እርዳታ ወደ ሀኪም ቤት የሚሄዱት ግን በአብዛኛው ህመሙ ስር ከሰደደ በኋላ መሆኑ ሀኪሞቹን እያሳሰበ ነው።

ዶክተር ብሩክ ሀብታሙ በሀረማያ ዩኒቨርሲቲ ስር የሚገኘው ሕይወት ፋና ሆስፒታል የካንሰር ህክምና ባለሙያ ናቸው። በዚህ ሀኪም ቤት የካንሰር ማዕከል ተከፍቶ ህክምናው በስፋት መሰጠት ከጀመረ ሦስት ዓመት አስቆጥሯል። ሆኖም በሚያክሙበት ስፍራ ኬሞቴራፒ የሚባለው በመድኃኒት የሚሰጠው ህክምና እንጂ የጨረር ህክምና ግን ገና አልተጀመረም። ሌሎች በካንሰር ህክምና ላይ አትኩረው የሚሠሩ የህክምና ባለሙያዎች እንደሚገልጹት የጡት ካንሰር ብዙዎች ላይ ከሚገኙ የካንሰር አይነቶች ቀዳሚው መሆኑን ዶክተር ብሩክም አስተውለዋል።

በአካል ላይ ለውጥን መከታተል እንደሚገባ የሚመክሩት የህክምና ባለሙያዎች በተለይ የጡት ካንሰር በሚያሳያቸው አንዳንድ ምልክቶች ፈጥኖ ሊደረስበት እና ታክሞም ሊድን እንደሚችል ይናገራሉ። አብዛኛው የማኅበረሰብ ክፍል ግን በቂ መረጃ ባለማግኘት ሊሆን ይችላል ይኽን የተገነዘበ አይመስልም። ዶክተር ብሩክም ይህንኑ ያረጋግጣሉ። ለዚህ ደግሞ ሰዎች በቂ መረጃ አለማግኘታቸው ዋነኛ መንስኤ እንደሆነ አጽንኦት ይሰጣሉ። ዶክተር ብሩክ የገለጿቸው ዋነኛ ምክንያቶች ናቸው ይበሉ እንጂ ይኽም ብቻ አይደለም ሰዎች በጊዜ ወደ ህክምና እንዳይሄዱ እንቅፋት የሚሆኑት። አለማወቅም በራሱ ሌላቸው ችግር ነው።

የካንሰር ህክምና ከፍተኛ ባለሙያው ዶክተር ቢንያም ተፈራ በአዳማ ሆስፒታል ሜዲካል ኮሌጅ ተባባሪ ፕሮፌሰር ናቸው። ዶክተር ብሩክ እንደገለጹልን እሳቸው የሚያገለግሉበት ሆስፒታል የካንሰር ማዕከል ዶክተር ቢንያም በአዳማ ሆስፒታል ኅብረተሰቡ ስለካንሰር ህመም እና ህክምና በቂ ግንዛቤ እንዲያገኝ ያመቻቹ የመማማሪያ መድረክ ያስገኘው አበረታች ውጤት ለእነሱ ማዕከል አርአያ ሆኗል።  እነ ዶክተር ቢንያም አዳማ ላይ በሁለት ዓመታት ጉዞ የተሻለ ውጤት ያገኙበትን ተሞክሮ መነሻ በማድረግም በሕይወት ፋና ሆስፒታል የካንተር ማዕከልም ባሳለፍነው ቅዳሜ ዕለት የካንሰር ታማሚዎች መረጃ የሚለዋወጡበት መድረክ ተቋቁሟል። ዶክተር ቢኒያም ከህክምናው ጎን ለጎን ሰዎች ስለካንሰር ህመም ምንነት ማወቅ እንዲችሉ ሁኔታዎች መመቻቸት ይኖርባቸዋል ባይ ናቸው። ለዚህ ደግሞ ታክመው የዳኑት ወገኖች ትልቅ ሚና አላቸው። በነገራችን ላይ አዲስ አበባ ቀደም ብለው እንዲህ ያለውን ስለካንሰር መረጃ የመለዋወጫ መድረክ ያዘጋጁት ወይዘሮ ሜሮን ከበደ በዚህ ዝግጅት ቀርበው ልምዳቸውን ማካፈላቸው ይታወስ ይሆናል። ወይዘሮ ሜሮን ደጋግመው በራሳቸው ጥረት እና ባካሄዱት ምርመራ የጤና ችግሩ እንደገጠማቸው በማወቃቸው በህክምና ድነው ዛሬ ሌሎችን በማንቃቱ በኩል የበኩላቸውን አስተዋጽኦ በማድረግ ላይ ይገኛሉ። ዶክተር ቢንያምም ወይዘሮ ሜሮን ካቋቋሙት ፒንክ ሎተስ ኢትዮጵያ ልምድ መቅሰማቸውን ገልጸውልናል።

ሸዋዬ ለገሠ 

ኂሩት መለሰ