የኢትዮጵያ ጋዜጠኞችን እንግልት የሚሰንደው አዲስ ድረ-ገጽ

በኢትዮጵያ የመገናኛ ብዙኃን እና የማኅበራዊ መገናኛ አውታር ጋዜጠኞች  ላይ የሚደርሰው ጫና እና እንግልት ከጊዜ ወደ ጊዜ እየጨመረ ነው ።  ከእስር እና ከስደት ባሻገር ጋዜጠኞች ንብረቶቻቸው በጠራራ ጸሐይ በተቀናጀ መልኩ ይመዘበራል፤ መሥሪያ ቤታቸው ቁልፍ ተሰብሮ ይበረበራል ። ተደጋጋሚ እንግልት እና በደል እንደሚፈጸምባቸውም በተደጋጋሚ ይነገራል ።  ይህን መሰል መረጃ ግን በስርዓቱ መመዝገብ እና መሰነድ  የሚያስችል አሠራር ባለመኖሩ በተቀናጀ መልኩ ክትትል ለማድረግ አስቸጋሪ ሆኖ ቆይቷል ።

የኢትዮጵያ አርታኢያን ማኅበር (ኢ.አ.ማ) በመባል የሚጠራው የኤዲተሮች ማኅበር አዲስ የባለሞያዎች ጥቃት መመዝገቢያ ድረ ገፅ ወይም (portal)  አዘጋጅቶ ሥራ ላይ አውሏል ። ድረገፁ ሥራ በጀመረ በ3 ቀናት ውስጥ ብቻ ከ 13 በላይ ጥቆማዎች እንደደረሱት ዐሳውቋል ። 

ይህ ድረ-ገፅ ወይም ፖርታል በእንግሊዝኛ sojethiopia.org ይባላል በኢትዮጵያ በመገናኛ ብዙኃን ባለሞያዎች ላይ የሚደርስባቸውን ማነኛውም አይነት ጥቃት መመዝገብ የሚያስችል ነው።

በተባበሩት መንግስታት የትምህርት ሳይንስ እና ባህል ድርጅት (UNESCO) ድጋፍ የተደረገለት እና ስራ ላይ የዋለው ይህ ፖርታል ሰዎች ከየትኛውም የሀገሪቱ ከፍል ጥቆማቸውን በአራት ቋንቋዎች መስጠት የሚያስችል ነው ። ድረገፁ ሥራ በጀመረ በ3 ቀናት ውስጥ ብቻ ከ 13 በላይ ጥቆማዎች ደርሰውናል ሲሉ  የኢትዮጵያ አርታኢያን ማኅበር ዳይሬክተር ደረሰ ንጋቱ ለ DW ታናግረዋል ።

በኢትዮጵያ የሚገኙ የመገናኛ ብዙኃንና የማኃበራዊ ሚዲያ ጋዜጠኞች ከሥራቸው ጋር  ተያይዞ  በሚደርስባቸው ጫና እስር እና እንግልት ሳብያ ብዙዎቹ  ሥራውን እየተው ፣የተቀሩት እየተሰደዱ ፣ ገሚሱ ሲታሰሩ ማየት እና መስማት እንግዳ አይደለም ። ጥቆማውን ከሰበሰብን በኋላ ቀጣዩ ሥራ ከአጋር ማኅበራት ጋር በመሆን እንሠራለን ብለዋል ዳይሬክተሩ ።

ባሳለፍነው ሳምንት የተሰደደው ኢትዮ ኒውስ የተሰኘ ድረ-ገፅ ጋዜጠኛ በለጠ ካሳ በኢትዮጵያ ያለውን ሀሳብን በነጻነት የመግለፅ ነፃነት ጀንበር ጠልቋል ሲል ለ DW ተናግሯል ።

የመጀመሪያ የሆነው sojethiopia.org የተሰኘ ድረ-ገፅ ወይም ፖርታል  በመገናኛ ብዙኃን ባለሞያዎች ሥራቸውን በሚሠሩበት ወቅት የሚደርስባቸውን ማዋከብ እንግልት ፤ እስካሁን እብዛም ትኩረት ያላገኛውን  ሴት ጋዜጠኞች በሥራ ቦታቸውም እና በሥራ  ጉዞ ላይ የሚደርስባቸውን  ፆታዊ ጥቃት ጭምር የሚመዘግብ  ማዕቀፍ ነው ።

ሐና ደምሴ

ማንተጋፍቶት ስለሺ

ታምራት ዲንሳ