„Има ли пастири кои ќе водат кон вистинско човекољубие?“

Во снежен амбиент, под минусни температури и со топли честитки, православните верници денеска го слават големиот христијански празник - раѓањето Христово, Божик. Празнувањето започна вчера со бадникови церемонии и литургии, а ќе продолжи денеска во сите храмови на Македонската православна црква - Охридска Архиепископија (МПЦ-ОА).

„Божик е празник на небоземната радост - денот кога сите битија го слават Бога и се радуваат на спасоносниот настан!“, порачаа поглаварот на МПЦ-ОА г.г. Стефан и Светиот архиерјски синод во божикното послание  упатено до свештенството, монаштвото и до сите верници.  

„Празникот на Христовото рождество е празник на богославењето, празник на мирот и на добрата волја. Ние ќе се покажеме како вистински христијани и миротворци - само ако мирот Божји владее во срцата наши и доколку градиме и го чуваме мирот, и во себе и околу нас. Таму каде што нема вистински мир со Бога, таму нема ни мир ни добра волја меѓу луѓето. На овој ден, но и во сите денови од нашиот живот, за миг да се пренесеме во витлеемската пештера - која е симбол на Божјото смирение и на Божјата љубов, и да твориме и возвраќаме со богољубие и со човекољубие. Колку повеќе растеме, живеејќи ја верата во Бога, толку повеќе ќе имаме љубов и кон Него и кон луѓето!“, се вели во посланието.

Во него се повикува оваа генерација да покаже достојна грижа за националните вредности и посебности што како на народ се дарувани од Бога и оставени како аманет од претходниците.

„Да си ги чуваме верата православна и Црквата Светиклиментова, нашето духовно и национално единство, како и нашата татковина Македонија - за и тие да нè зачуваат нас“, се вели во празничната порака.

Посланието се осврнува и на меѓучовечките и меѓународните односи, со оценка „како сè уште да не е слушната ангелската песна, како да не е разбрана пораката за мир на земјата, и како да не допрел повикот за добра волја меѓу луѓето“.

„Денес многумина зборуваат за мир, а сè повеќе тежнеат кон војна, зборуваат за благосостојба, а сеат кризи меѓу земјите и народите. Па има ли денешнава генерација морални и мудри луѓе, кои човештвото ќе го насочат кон искрено и вистинско човекољубие? Има ли денешново човештво пастири, кои народите ќе ги упатат по патот на вистината и животот? И има ли некаде, па и меѓу нас, слични на оние витлеемци, кои во срцата и душите свои ќе најдат место и ќе му подарат пештера на Господа? Конечно, ќе го најде ли современото човештво вистинскиот пат, патот на мирот Божји или ќе продолжи кон бездната на злото и гревот, кон раздори и војни?!“, се вели во божикното послание.

Во него, поглаварот и САС потенцираат дека  „личноста на Богомладенецот никогаш не му била попотребна на човечкиот род и на светот како денес, и дека е вистинско време конечно да тргне по патот Господов, најпрво помирувајќи се со Бога, потоа со самите себе и со сите околу нас“.

Честитка од премиерот

Овој Божик Македонија веќе го дочека со делумно помирување, но како резултат на политичка одлука (Закон за амнестија) за настаните што се случија во „храмот на демократијата“ во 2017 година. Најавени се обиди за помирување во сите сегменти на општеството, пред се меѓу младите, меѓу партиските подмладоци и навивачките групи. Тие обиди повеќе се рефлексија на актуелните политички процеси и потреби, отколку на самосвесно прифаќање на повиците од верските заедници и водачи - за мир, љубов и разбирање меѓу граѓаните. Дали нешто ќе се промени во иднината, на која сите се повикуваат?

Таа, преку денешниот празник, ги обедени политичарите во воздржувањето од критики кон опонентите. Предност добија желбите за мир, љубов и подобра иднина. Премиерот Зоран Заев во честитката до сите православни верници, потсетува дека овој голем празник не повикува да го чествуваме не само заради историјата, уште помалку и најмалку заради обичаите, туку како празник потсетник за да ги отвориме срцата за да ја примиме радоста од Христовото раѓање. 

„Исполнети со таа радост да си посакаме сите еден на друг од срцата да извадиме сѐ што е непотребно, сѐ што е пречка за личен мир, за спокоен дух. Божик нека ни биде исполнет со радост на патот на новата надеж за подобро утре за секој човек, во секој дом. Таа надеж и желба за подобро утре да ја пренесеме и во нашиот заеднички дом, општеството, за да го изградиме како похумано и поправедно, со просперитетна иднина за сите“, се вели во честитката од премиерот.

Солидарност, социјална правда, подобра иднина

Претседателот Ѓорге Иванов го честиташе Божик осврнувајќи се на аспектот на социјалната правда.

„Се роди на маргините на општеството, во обесправено и прогонето семејство кое таа вечер немало ниту свој дом. Оттука, Божик е израз на Божјата солидарност со луѓето. Како дел од неговата земна мисија, ги исцели болните, им помогна на сиромашните, им посвети внимание на заборавените, им даде достоинство на отфрлените, надеж на безнадежните и им понуди откупителна љубов и простување на сите. Христос ги рушеше човечките бариери што ги делеа луѓето на богати и сиромашни, слободни и неслободни, вредни и помалку вредни, создавајќи духовно променети луѓе кои го менуваат духот на општеството. Нам во Република Македонија ни е неопходно обновување на духот на солидарноста и на социјалната правда. Затоа, кога се поздравуваме со радосните зборови - Христос се роди - да се потсетиме дека со Христос се роди и надежта за спасението на човештвото преку промената на човековото срце“, порача Иванов во честитката.

Честитики до МПЦ и до верниците упати и претседателот на ВМРО-ДПМНЕ, Христијан Мицкоски.

„Божик го симболизира раѓањето на надежта, надеж за подобра иднина, подобро утро за идните поколенија. Влегуваме во година на предизвици и одлуки. Црнилата и растечката сиромаштија преовладуваат во секојдневието на граѓаните, и тоа се заедничките тешкотии кои мора да бидат надминати. Да си спомнеме за сите оние граѓани кои овие празници ги дочекуваат со напластени проблеми, со неизвесност која преовладува и живот кој станува потежок. Несигурноста да биде замената со стабилност, да градиме иднина, да се избориме за подобар живот. Светлоста на еден од најголемите христијански празници нека биде водилка за секој еден на патот на личниот успех и среќа, бидејќи успехот на поединецот е успех за сите“, порача Мицкоски.

Од негово и од име на ДУИ, и партискиот лидер Али Ахмети го честиташе Божик со желби за спокој, мир, здравје и благосостојба.

„Славењето и одбележувањето на раѓањето на надежта и на вербата треба да не поттикне на уште поголема посветеност кон реализација на таа надеж за подобар, посигурен, побезбеден и поперспективен живот за сите нас, заедно. Уверен сум дека нашето заедништво го градиме преку истите стремежи за подобар живот, за соживот, за општество без предрасуди, напредок, мир и интеграција. Празниците како Божик не потсетуваат да подзастанеме, и да размислиме дали сме на вистинскиот пат, а денес јас сум уверен дека сме во правец на нашата заедничка подобра иднина“, се вели во честитката од Ахмети.