Барања за нов договор за гастарбајтери од Балканот

Во текстот под наслов „Австрија ги фали мигрантите од Балканот“, весникот „Франкфуртер алгемајне цајтунг“ (ФАЦ) пишува:

„Според експертите, соседната држава има добри искуства со мигрантите од поранешна Југославија, кои сочинуваат најголем дел до странците во таа земја. ’Тие се подобро интегрирани од Турците, а и имаат најмала стапка на невработеност’, вели економистот Моника Кепл-Турина од виенската тинк-тенк организација Агенда Австрија. И Аугуст Гехтер, кој во виенскиот Центар за социјална иновација ја истражува работната миграција , констатира: ’Јавноста смета дека интеграцијата се одвива апсолутно без проблеми.’ Според податоците на Агенда Австрија, стапката на невработеност меѓу овие доселеници (9,9 проценти) е двојно повисока отколку стапката на невработеност на вкупното население, но е многу пониска од стапката на невработеност на Турците во Австрија (15,5 проценти)... ’Луѓето од екс Југославија често добро зборуваат германски, добро се образовани и преку заедничката историја имаат и извесна врска со Австрија’, вели Кепл-Турина...Во рамките на актуелниот бегалски бран, се‘ повеќе лица од Западниот Балкан доаѓаат преку Австрија во Германија. Германската влада не сака да им одобри азил, но планира на еден дел од нив да им овозможи работа и обука за работа... Министерката за труд Андреа Налес (СПД) размислува за тоа на 20.000 Балканци годишно да им се доделува дозвола за престој. Но, само во јуни и јули во Германија стигнаа 22.200 луѓе од регионот. ’Предлогот е виц’, вели Душан Рељиќ, раководител на канцеларијата во Брисел на фондацијата Наука и политика. Наместо тоа, тој бара сеопфатен ’пакт за вработување’: во ЕУ се намалува бројот на работоспособни лица, додека во ЈИЕ нема работа. И Институтот за истражување на пазарот на работа и професии се залага за склучување договор за гастарбајтери од Западен Балкан, со оглед на тоа што таму нивото на образованост на населението е повисоко отколку во други региони. Сепак, 30 проценти од овие баратели на азил се Роми, чија квалификуваност е често лоша“, пишува ФАЦ.

Германскиот печат денеска го коментира и говорот на претседателот на Европската комисија Жан-Клод Јункер во Европскиот парламент околу бегалците и европската солидарност. „Нирнбергер Нахрихтен“ оценува:

„Јункер и‘ го врати на Европа достоинството. По повеќемесечни расправии меѓу шефовите на држави и влади, по страшните слики од илјадници бегалци кои бегаат од војна, а кои талкаат низ ЕУ и се испраќаат од една земја во друга, по предолгиот молк од страна на раководството на Унијата, настапот на претседателот на Европската комисија беше силен сигнал: оваа заедница се држи до зборот и до своите вредности. Сепак, колку и шефот на ЕК да има добри идеи и горлив апел за прием на бегалците - се‘ додека шефовите на држави и влади не се придружат, тоа ќе останат празни зборови. А, досега се‘ личи на такво нешто.“

Весникот „Нојес Дојчланд“ коментира:

„Во оваа Европска унија ниту има доволно Европа, ниту доволно Унија. Впечатливите пароли на Жан-Клод Јункер со кои ја опиша состојбата во европската заедница на држави дадоа слика не само за говорничкиот талент на претседателот на Европската комисија. Јункер во Европскиот парламент доби многу аплауз. Тоа беше и за очекување. Во главните градови на 28-те земји членки работите изгледаат сосема поинаку. А, тоа не може да се промени со еден говор... Неговите зборови веќе наскоро би можеле да влезат во историјата на ЕУ како чисто жалење, ако не се придружат државите и луѓето кои живеат во ЕУ.“