Ковачевски и Шолц разговараа за проширувањето на ЕУ

Војната во Украина покажа дека проширувањето на ЕУ со земјите од Западен Балкан не е само прашање на проширување, туку и геостратешко позиционирање во регионот. Северна Македонија целосно ги исполни условите за почеток на преговорите со ЕУ и граѓаните на земјата очекуваат и Брисел да го исполни својот дел од обврската. Ова е пораката која што му ја пренел македонскиот премиер, Димитар Ковачевски на канцеларот на Сојузна Република Германија, Олаф Шолц. Средбата се одржа во рамките на неговата работна посета на Брисел, каде учествува на состанокот на Северно-атлантскиот совет во рамките на вонредниот самит на шефови на држави и влади на НАТО.

Од Владата соопштија дека двајцата соговорници на средбата изразиле големо задоволство од континуираниот развој на пријателските односи кои се рефлектираат и во економската соработка и трговската размена.

„Двајцата шефови на влади ги нагласија заеднички споделените ставови во однос на воената агресија на Русија во Украина, при што премиерот Ковачевски потенцираше дека Северна Македонија се приклучи кон санкциите на ЕУ кон Русија согласно целосната усогласеност со надворешната и безбедносната политика на Брисел“, информираат од Владата.

Ковачевски го информирал канцеларот Шолц за напредокот во дијалогот со Бугарија кој има за цел да го деблокира процесот за свикување на првата меѓувладина конференција меѓу Северна Македонија и Брисел за почеток на преговорите за членство на земјата во ЕУ.

.