Мицкоски прогласи победа и му порача на Заев да замине

Лидерот на ВМРО-ДПМНЕ, Христијан Мицкоски вечерва прогласи убедлива победа во поголем број општини во земјата, почнувајќи од главниот град Скопје, каде победи независната кандидатка Данела Арсовска, поддржана од опозицијата. Тој најави дека промените почнуваат од вечерва, а ќе водат до ново парламентарно мнозинство и предвремени парламентарни избори. Мицкоски упати порака до лидерот на СДСМ, Зоран Заев да замине од политиката. 

„Не треба тактизирање, треба да се донесат државнички одлуки и да се послуша волјата на народот. Ова е убедлива победа на опозицијата. Сакам да го замолам да размисли добро што ќе бидат следните чекори, да се надмине себеси и да ја разбере конечно пораката дека е доста и мора да замине. Нема веќе место за криминал. Не треба само Заев да си оди, туку и заевизмот и сето она што тој го претставува“, порача Мицкоски од партиското седиште, каде што се прославува победата. 

Според лидерот на опозицијата, власта е делегитимирана од вечерва и таа реалност очекува во наредниот период да се рефлектира и во парламентот. 

„Македонија е преважна за мали соништа. Стравот никогаш не ја гради иднината, но надежта - да. Многумина се сомневаа дека успехот е можен, но надежта победи. Македонија мора да се менува, а промените почнаа вечерва. Сите заедно за нова иднина, заеднички и сложно да го оствариме сонот за кој 30 години сонуваме. Кажете им на сите дека ова е денот од кога почнуваат промените за имиџот на државата, за заштита на интересите на секој човек. Ова е убедлива победа, ова е победа на народот на Македонија“, рече Мицкоски. 

Додека присутните во партиското седиште извикуваа: „Цело Скопје вмровски град“, Мицкоски им порача „Скопје е вмровски, но од утре е и слободен град“. 

Лидерот на ВМРО-ДПМНЕ прогласи победа и во Битола, Брвеница, Василево, Вевчани, Гевгелија, Демир Хисар, Зелениково, Конче, Кочани, Кратово, Лозово, Македонска Каменица, Македонски Брод, над 4.000 градови разлика и за кандидатот на опозицијата во Охрид, Радовиш, Ресен, Чешиново Облешево, Ранковце, Карпош, Скопје...

На новите градоначалници им порача да не го разочаруваат народот, кој мора да види разлика и резулати во работењето.  „Заасукајте ги ракавите и од утре на работа. Вашите фотељи заменете ги со терен и работа со граѓаните, носење решенија на нивните проблеми, заборавете на матни тендери, договори во четири очи и никогаш не заборавајте од каде доаѓаме и од каде почнавме. Јас ќе бидам најверната сенка во работата и ваш пријател, но и најостриот критичар доколку не успеете“, рече Мицкоски. 

Победа во Скопје и Карпош 

Независната кандидатка за градоначалник на Скопје, поддржана од ВМРО-ДПМНЕ, Данела Арсовска, на прес-конференција се заблагодари за поддршката на граѓаните, кои како што рече, не потпаднале под црната кампања и и ја дале својата поддршка. Според неа, разликата со Петре Шилегов, кандидатот на СДСМ, е повеќе од 20.000 гласови.

„По тешки битки во оваа кампања, каде мој противник не беше само стариот градоначалник, туку и премиерот во заминување, сега за првпат, по 30 години независна Македонија, Скопје има жена за градоначалник. Сега имаме нова шанса уште од првиот ден да почнеме да работиме и Скопје да го трансформираме во модерен и чист град“, рече Арсовска. Таа најави дека по вечершната прослава уште од утре ќе започне со работа и барање одговорност за она што не е сработено досега. Најави дека дел од проектите ќе мора да се реализираат уште во првите 82 дена од мандатот. 

СДСМ ја изгуби и битката за Карпош, каде победи поранешниот градоначалник на Карпош, а на овие избори кандидат на ГРОМ, Стевче Јакимовски, кој беше поддржан од опозицијата.  Во обраќањето пред граѓаните, Јакимовски обвини дека бил цел на разни напади, но дека знаел дека ги има граѓаните на своја страна. 

„Бев омаловажуван, оспоруван, притворуван… Тргнав во овој поход, но знаев дека го имам народот на своја страна. Оваа победа се вика победа на граѓаните на Карпош. Од самиот старт знаев дека ќе дојдам до оваа ситуација. бев сигурен дека ќе победам… Знам дека во наредниот временскиот период ќе ги коригираме грешките, ќе работиме уште попосветено и поорганизирано и уште поотворени ќе бидат вратите за решавање на проблемите на граѓаните на Карпош“, изјави Јакимовски.