Чудење и вознемиреност во Германија по интервјуто на Трамп

Претседавачот со комитетот за надворешна политика во германскиот парламент, Норберт Ретген изјави дека размислувањето на Трамп е „опасна новина за Европа и за светот“.
„Веројатно може да се каже дека во реалноста, во неговото размислување, Западот не постои“, изјави Ротген за германското радио Дојчландфунк. „Дали ЕУ е поделена или оспорена нему не му е важно, дали НАТО постои или не, нему не му е важно. Тоа е за него застарено“.
Ретген, кој важи за близок соработник на канцеларката Ангела Меркел, оценува дека Трамп нема политичка агенда и кусогледо е фокусиран само на САД.
„Мислам дека Западот како нормативен и политички ентитет, во неговото размислување не постои. Тоа е новина, и тоа опасна новина за Европа и за светот“, заклучува Ретген.
И други водечки германски политичари реагираа изненадено и критички кон изјавите на Трамп дадени во заедничко интервју за германскиот „Билд“ и за британскиот „Тајмс“. Трамп, меѓудругото, им се закани и на германските автомобилски производители дека ќе се соочат со царини од 35 проценти доколку отворат фабрики во Мексико и оттаму извезуваат автомобили во САД.

„Ние не сме слаби“

„Таквите тарифи само ќе ја влошат состојбата на американската авто-индустрија, ќе ја направат послаба и поскапа“, оцени германскиот министер за економија, Зигмар Габриел. Тој демонстрираше самоувереност кога е во прашање односот кон Трамп. „Ние не сме ни слаби, ниту инфериорни“. 
Коментирајќи ги тврдењата на Трамп дека германските автопроизводители не се однесуваат фер, затоа што во САД се продаваат многу германски автомобили, а во Германија- американските речиси и да ги нема, Габриел сугерираше дека решението можеби е „САД да произведуваат подобри автомобили“.
По разговорите со генералниот секретар на НАТО, Јенс Столтенберг во Брисел, шефот на германската дипломатија Франк Валтер Штајнмајер рече дека изјавата на Трамп за „застареноста на НАТО“ биле примени со аларм. Севкупно, изјавите на Трамп за ЕУ и НАТО во интервјуто предизвикаа „чудење и вознемиреност“ не само во Брисел, рече Штајнмајер, кој се очекува следниот месец да ја презема функцијата германски сојузен претседател.

Канцеларката Ангела Меркел „со голем интерес“ го читала интервјуто на идниот американски претседател, изјави нејзиниот портпарол. Сепак, тој одби да коментира поединечни ставови од интервјуто.
„Ќе ја почекаме инаугурацијата на Трамп, а потоа блиску ќе соработуваме со новата администрација“, рече тој.
Германскиот координатор за трансатлански односи, Јирген Харт, оцени дека ставовите на Трамп за НАТО се во спротивност со она што го изјавуваа неговите предлози за иден Државен секретар и министер за одбрана. Харт не очекува американскиот Конгрес да му дозволи на Трамп да се откаже од водечката улога во НАТО.