Штајнмајер: Светлото на крајот на тунелот станува посилно

„'Кога можам повторно да ги живеам своите соништа?' Оваа длабока воздишка, драги сонародници, е една од илјадниците приватни пораки кои пристигнаа до мене од сите делови на нашата земја“, вели на почетокот од своето обраќање Сојузниот претседател.

Ретко имало божиќно обраќање на еден Сојузен претседател, а темата однапред да била толку јасна и сеприсутна. Ако порано претседателите на Божик зафаќаа главно различни општествени теми, овојпат речиси исклучиво станува збор за пандемијата на корона.

Еден „мал вирус“ доминира со нашиот живот и нашето размислување, тојрасипа планови и уништи соништа, вели Штајнмајер. „Фудбал на стадион, кино и концерт, патување и одмор, свадба“, моравме да се откажеме од многу нешта. Претседателот зборува за нервозни ученици и исцрпени семејства кои мораат да се носат со она што го предизвикува корона-пандемијата во наставата и на работното место. Тој зборува за уметниците, гастрономите, хотелиерите и трговците кои стравуваат за својата егзистенција.

Сосема поинаков Божик

Божик годинава е поинаков. „Празник на љубовта - да! Но, токму овие денови, во кои сакаме да сме посебно близу едни до други, мора да држиме дистанца. Нам - и мене - ни недостигаат пријателите и роднините кои не сме можеле да ги видиме во текот на целата година. Многу постари лица и болни остануваат сами за да се заштитат од вирусот.“

Штајнмајер потсетува особено „на жените и мажите кои во овие часови се борат против вирусот на одделенијата за интензивна нега, на нивните најблиски кои се плашат за нив“, на луѓето „кои ја загубија борбата против вирусот. Многумина беа огорчени, осамени во своите последни часови. И сите тие недостигаат.“

„Нашата земја е силна“

Истовремено, пандемијата покажа колку општеството може да биде силно, „ако внимаваме еден на друг и ако сме тука еден за друг“.

И, потоа доаѓа реченицата која потсетува директно на канцеларката Ангела Меркел пред пет години: „Нашата земја е силна“. Така и Ангела Меркел во август 2015 година ја изговори својата позната реченица „Ќе успееме“, во моменти кога во земјата пушти стотици илјади бегалци и мигранти. Дали Штајнмајер свесно алудира на Меркел или не, не е познато, но во секој случај и кај него, како и кај неа тогаш, пораката гласи: Германија ќе излезе на крај со сите предизвици.

Сојузниот претседател сака да укаже дека ако сите соработуваат и државата го направи своето, тогаш Германија ќе ја издржи кризата. Во пандемијата е зајакнатa граѓанската свест и подготвеност да се работи за општо добро, вели Штајнмајер. Тоа охрабрува и за други кризи, од промената на климата до борбата против гладот и сиромаштијата.

„Разумните се големо мнозинство“

Претседателот на оние кои во оваа криза се сомневаат во државата и општеството, им порачува: „Во време на несигурност научивме дека може да и' веруваме на нашата демократија. Се расправавме за исправниот пат, а одлуките потоа сепак ги донесовме заедно. Оние кои ја негираат опасноста од вирусот се честопати многу гласни, но разумните се големо мнозинство.“ Демократијата и опасностите за неа беше големата тема на Штајнмајер досега во време на мандатот како Сојузен претседател. Овде тој тоа го поврзува со акутната голема тема во политиката и општеството.

И, со оглед на тоа што фундаментот, според него, издржал, Штајнмајер заклучува дека „и овој Божик ќе биде празник на надеж“!

2021-ва повторно со „прегратки и песна“

За ваквата надеж придонесуваат и вакцините. Штајнмајер уште пред неколку дена ги повика граѓаните да се вакцинираат. Тоа е „акт на општествена солидарност“, рече тој. Претседателот знае дека во Германија има многу противници на вакцинирањето. Тој не сака да ги разубавува работите, но сака да охрабри: „Пред нас има уште еден долг и напорен пат, но гледаме дека долго очекуваното светло на крајот на тунелот станува посилно.“

Колку долг ќе биде патот, зависи од сите. Ако сите бидат „разумни и трпеливи“, наскоро многу работи од кои долго мораме да се откажуваме, ќе бидат повторно можни, нагласува Претседателот.

На крајот од своето обраќање, Штајнмајер не се стеснува ниту од прогноза за наредниот Божик. „Смееме да се радуваме дека наредниот Божик повторно би го славеле онака како што сакаме: во голем семеен круг, со нашите пријатели, со прегратки и песна. Нека радоста за она што доаѓа ни помогне за разубавување на овие невообичаени празници. Имајте благословен Божик!“