Шумахер и Мерцедес се вратија на голема врата
25 јануари 2010
41-годишниот рекордер по бројот на освоени титули се враќа полни три години по заминувањето во пензија со освоени 7 титули. Шумахер најави дека неговиот камбек, бездруго значи и оти планира уште титули.
„Оваа комбинација, Мерцедес, Рос и мојот ангажман ни остава само една цел, а тоа е освојување на светскиот шампионат. Тоа не значи дека мора да се случи во првата година. Сепак сме нов тим и ќе ни треба малку време“, рече Шумахер.
Во музејот на Мерцедес во Штутгарт денеска се испиша уште една страница од историјата на оваа компанија, откако беше претставен новиот модел. Моделот МГП 01 истовремено ќе биде и првата „сребрена стрела“ целосно под контрола на тим на Мерцедес на патеките во Формула 1, уште од далечната 1955 година. Првиот човек на компанијата Мерцедес Бенц, Дитер Цече не го криеше задоволството од, како што рече, формирањето на германскиот национален тим во Формула 1.
Во тимот кој ќе го предводи Рос Брон, покрај Шумахер ќе настапи уште еден домашен возач, Нико Розберг. Првата проба на новиот болид е закажана за 1 февруари на патеката во Валенсија, а првенството почнува на 14 март во Бахреин.
Автор: БГ/ЖА/ројтерс/дв