Десетици жртви во протестите во Иран

Министерството за внатрешни работи на Иран соопшти дека не може да даде прецизни информации за бројот на жртвите во протестите кои траат повеќе од една недела. „Има различни групи жртви и затоа точните бројки ќе бидат достапни само по истрагите“, ги пренесуваат денеска (24.09) локалните медиуми зборовите на министерот за внатрешни работи Ахмад Вахиди. Тој сепак повтрди дека меѓу жртвите има и демонстранти и припадници на безбедносните сили и полицајци. Според министерот, луѓе кои сакале да влезат во „високо обезбедувани објекти“ биле застрелани од страна на обезбедувањето.

Иран последен пат пред два дена потврди 17 до 20 жртви во протестите. Иранската државна телевизија ИРИБ јави за 35 жртви, додавајќи дека е тоа неофицијална бројка. Организацијата за човекови права Хјуман Рајтс Иран јави дека досега загинале најмалку 50 луѓе, а уапсени се повеќе од 700 лица.

Протестите избија по смртта на 22-годишната Махса Амини минатата недела. Таа била уапсена од „полицијата за морал“ поради тоа што не ја носела шамијата според строгите правила за облекување. Амини од досега неразјаснети причини паднала во бессознание во полициската станица и починала три дена подоцна во болница. Активистите за човекови права тврдат дека девојката починала поради смртоносен удар во главата. Министерот Вахидни, пак, тврди дека Махса Амини не била тепана.