САД се закануваат со одмазда по нападот врз база во Јордан

Иран ја отфрли одговорноста за нападот со беспилотно летало врз американската воена база во Јордан, позната како кула 22. Во смртоносниот напад загинаа тројца американски војници, а најмалку 34 други беа повредени. Иран вели дека зад таквите тврдења се кријат „политички цели“.

Американскиот претседател Џо Бајден се закани со одмазда. „Не треба да има сомнеж дека ќе реагираме“, рече тој за време на посетата на баптистичка црква во Јужна Каролина. „САД ќе ги повикаат одговорните за нападот на одговорност во време и на начин што ние ќе го избереме“, додаде Бајден.

Противречни информации

Нападот се случи во саботата вечерта во североисточниот дел на Јордан, во близина на границата со Сирија, изјави Бајден. Јорданската државна телевизија, сепак, цитираше владин портпарол дека нападот се случил надвор од Јордан - односно на сириската страна на границата. Проиранските паравоени трупи во Ирак ја презедоа одговорноста за нападот и соопштија дека нападнале четири американски воени бази, вклучително и три во Сирија. Јордан се граничи со Сирија и со Ирак на североисток.

Ова се првите американски војници убиени во нападите на паравоените сили поддржани од Иран врз американските војници низ  Блискиот Исток.  Американската влада сè уште собира докази и се обидува да ги утврди фактите, но нападот е извршен, како што рече Бајден, од „радикални милитантни групи поддржани од Иран“ кои дејствуваат во Сирија и Ирак. „САД продолжуваат со своите акции во борбата против тероризмот, додаде американскиот претседател.

Иран ги негира обвинувањата

Според извештаите на медиумите, иранската влада негира каква било одговорност за нападот со беспилотно летало врз американските војници. Овие обвинувања се упатени со политичка цел за „извртување на реалноста во регионот“, изјави портпаролот на Министерството за надворешни работи, Насер Канаани, како што  пренесе државната новинска агенција ИРНА. Тоа беше одговорот на групите на отпорот во регионот „на воените злосторства и геноцидот на ционистичкиот режим“, додаде Канани, таргетирајќи го Израел, како најголем непријател на Иран. „Тие одлучуваат за своите постапки врз основа на сопствените принципи“, објасни иранскиот претставник. Претходно, британскиот министер за надворешни работи Дејвид Камерон го повика Техеран на деескалација. „Најостро ги осудуваме нападите на паравоените трупи во сојуз со Иран против американските сили. Продолжуваме да го повикуваме Иран да ја деескалира ситуацијата во регионот“, напиша Камерон на Платформата X во понеделникот вечерта.

Дронот очигледно пристигнал од Сирија

Си-Ен-Ен објави дека дронот бил „испратен“ од ловци поддржани од Иран, но дека очигледно  дошол од Сирија.  Нејасно е зошто американската противвоздушна одбрана не можела да го пресретне. Американските бази во  Ирак и Сирија, исто така, неодамна беа цел на беспилотни летала и ракетни напади. САД постојано изјавуваат дека стравуваат од тоа конфликтот на Блискиот Исток да ескалира во регионална војна. Американските трупи долго време го користат Јордан како воена база. Таму се стационирани околу 3.000 војници.

Проиранските милиции извршија бројни напади врз американските воени бази во Ирак и Сирија од средината на октомври минатата година. Во тој процес беа повредени голем број војници. Сириската опсерваторија за човекови права документирала повеќе од 100 напади врз базите на антитерористичката коалиција во Сирија. Во минатото, Пентагон нагласуваше дека инфраструктурата главно не била уништена во нападите. САД одговорија на тие акции  со неколку воздушни напади.

Од летото 2023 година, околу 3.000 американски војници се стационирани во Јордан, како што објави порталот Аксиос. Меѓу другото, тие го поддржуваат Јордан во борбата против терористичката Исламска држава (ИД).