Руските приходи од енергенси ги надминуваат воените трошоци

Руските приходи од извозот на фосилни енергенси во првите шест месеци од војната во Украина во голема мера ги надминуваат  трошоците на инвазијата.  Центарот за истражувања на енергијата и чистиот воздух (CREA) со седиште во Финска пресметал дека  приходите на Русија  во овој временски период изнесуваат околу 158 милијарди евра. Наспроти нив стојат воените расходи кои според проценките во овој период од шест месеци изнесуваат околу сто милијарди евра.

Русија, и покрај редуцираните извозни количини,  сѐуште остварува  рекордни приходи од фосилните горива,  објаснува аналитичарот Лаури Мулувирта. Податоците покажуваат дека ЕУ со 85 милијарди евра е најголемиот увозник на енергенсите, следи Кина со 35 милијарди евра. Во рамките на ЕУ пак на прво место е Германија со увоз на руски енергенси во вредност од 19 милијарди евра, со што е втор по големина купувач на руски фосилни горива во светот, веднаш зад Кина.

„За да се надмине ваквата ситуација, владите треба да воведат царини или да одредат горни граници за увозот од Русија, како и да ги забрзаат  мерките за штедење енергија“,  истакнува Мулувирта. Пред сѐ е потребно намалено трошење на нафта и на гас, „на тој начин што ќе се зголеми уделот на чисти енергии и електрификација преку топлински пумпи и возила на електричен погон“, вели аналитичарот од Финска.

Германија, и покрај напорите за редуцирање, посебно од избувнувањето на војната во Украина, уште е зависна од увозот на енергија од Русија.