Самит на ЕУ и Западен Балкан

Шефовите на држави или влади на земјите членки на ЕУ денеска (18.12.) во Брисел се среќаваат со своите колеги од државите од Западен Балкан. Тема на самитот се прашања поврзани со европската перспектива на Северна Македонија, Косово, Србија, Босна и Херцеговина, Албанија и Црна Гора. ЕУ во основа сака да ги врзе потесно со себе шесте балкански држави и да ги охрабри за натамошни реформи.

Состанокот ќе даде можност да се интензивира новата динамика за стратешко партнерство меѓу Европската Унија и Западен Балкан, се вели од Унијата пред самитот и се додава дека теми за разговор ќе бидат и соработката во управувањето со миграцијата и во борбата против корупцијата и организираниот криминал.

По состанокот со претставниците од Западен Балкан, според информации на германската агенција ДПА, канцеларот Олаф Шолц и уште неколку шефови на држави или влади сакаат да присуствуваат на разговорите меѓу генералниот секретар на НАТО, Марк Руте и украинскиот претседател Володимир Зеленски. Во четврток (19.12.) шефовите на држави или влади на членките на ЕУ ќе се сретнат на последниот редовен самит на Унијата годинава. Зеленски е поканет да присуствува како гостин.