Северно Косово: Отстранување на уличните блокади

Во време на продлабочување на кризата меѓу Србија и Косово на повидок е решение за 19 дневната блокада на патиштата. како што јавуваат српските медиуми Србите утринава веќе ќе започнаа со отстранување на барикадите, како што доцна синоќа беше најавено од страна на српскиот претседател Александар Вучиќ по средбата со Србите од северно Косово во Рашка. „Тоа е долг процес и ќе потрае некое време,“ рече Вучиќ. Прва според медиумите во Белград, била отстранета барикадата кај местото Мердаре а во тек е и отстранувањето на останатите блокади на патиштата. 

Причина за најновите тензии беше апсење на српски полицаец, кој наводно за време на претходните демонстрации нападнал полицајци од Косово. Српските демонстранти бараа негово ослободување и поставија блокади на улиците за време на протестите кои беа делумно насилни. Судот во Приштина сега одреди полицаецот да биде ослободен од затвор и да биде ставен во домашен притвор. 

Тензиите во регионот неделава се заострија откако Србија во понеделникот ја стави армијата во состојба на зголемена борбена готовност, а Косово во средата го затвори најголемиот граничен премин. НАТО, САД и ЕУ изразија загриженост од развојот на настаните и повикаа на воздржаност и решение преку дијалог.

Судот во Косово нареди ослободување на српскиот полицаец

Работите се чини се придвижија откако судот во Приштина нареди ослободување на српскиот полицаец, чие апсење беше причина за последните тензии. Судот на Дејан Пантиќ му го замени затворот со домашен притвор, соопшти неговиот адвокат Љубомир Пантовиќ за агенцијата АП. Сега треба со полиција да биде спроведен до неговиот дом, што може да предизвика нови проблеми бидејќи, како што посочува Пантовиќ, треба да ги поминат барикадите кои ги поставија Србите во знак на протест против апсењето на Пантиќ. Српскиот полицаец е обвинет дека за време на протестите нападнал косовски колега. Неговото апсење и обвинение за тероризам, предизвика протести од Србите на Косово, кои поставија блокади на Северот на земјата. Дојде и до истрели од огнено оружје и експлозии во близина на војници од мисијата КФОР предводена од НАТО, но немаше сериозно повредени. Косовската влада се закани дека насилно ќе ги отстрани барикадите, а Србија најави зголемена борбена готовност на своите трупи долж границата.

Косовскиот премиер ја критикуваше одлуката

Косовскиот премиер Албин Курти ја критикуваше одлуката. „Многу сум љубопитен да дознаам кој е обвинителот што поднел барање и кој е судијата кој донел одлука, да му се одреди домашен притвор на некој кој е обвинет за тероризам,“ рече тој. Државните медиуми и властите во Белград го претставија ослободувањето на поранешниот полицаец како “триумф“ на политиката на Вучиќ.

САД и ЕУ во средата во заедничко соопштение изразија загриженост за состојбата. „Повикуваме на најголема воздржаност и преземање итни мерки за безусловна деескалација на ситуацијата, како и сите да се воздржат од провокации, закани и заплашувања,“ се вели во пораката од САД и ЕУ. Во соработка со Вучиќ и Курти се стреми кон изнаоѓање политичко решение околу тоа како ќе се одвиваат работите во иднина. Француското министерство за надворешни работи ги предупреди сите патници во близина на српско – косовската граница да бидат особено внимателни и да избегнуваат собири, сѐ додека траат тензиите.

Конфликтот во регионот тлее веќе 20 години. На северот на Косово живеат околу 50 илјади Срби и тие одбиваат да ја признаат владата во Приштина и Косово како држава. И Србија не ја признава независноста на Косово.