Турција: Одлуката ќе падне веројатно во втор круг

По пребројувањето на 91,93 отсто од гласовите на претседателските избори во Турција, за 69-годишниот Реџеп Таип Ердоган гласале 49,49 отсто од гласачите, изјави вчеравечер (14.05) шефот на турската изборна комисија. Неговиот противкандидат Кемал Киличдароглу од опозициската ЦХП добил 44,49 проценти гласови.

Претходно, членови од двата табора признаа дека ниту еден од кандидатите нема да има повеќе од 50 проценти гласови во првиот круг. Ердоган, во првото обраќање по изборите,пред седиштето на неговата партија во Анкара изјави дека актуелните резултати покажувале оти тој е далеку пред Киличдароглу, односно дека имал околу 2,6 милиони гласови повеќе.

Киличдароглу по првиот круг избори исто така изрази увереност во победа и оцени дека желбата на општеството за промени е „повисока од 50 проценти“.

Допрва ќе се бројат гласовите од странство. Доколку ниту еден од двајцата кандидати не добие најмалку 50 отсто од гласовите во овој изборен круг, втор круг избори треба да се одржи на 28 мај.

Третиот кандидат на претседателските избори, Синан Оган, доби околу 5% од гласовите. „Во случај да има втор круг избори, пред нас ќе имаме тешки 14 дена“, изјави Оган вчеравачер, без да каже кого од кандидатите би го поддржал на 28 мај.