Спротиставени пораки од Холандија и од Велика Британија

Холанѓаните на возраст под 60 години нема да бидат вакцинирани со вакцината на АстраЗенека во наредните денови, одлучи министерството за здравство поради случаи на згрутчување на крвта евентуално предизвикани од вакцината.

Холандскиот центар за истражување на несакани ефекти Лареб денеска објави дека меѓу дадените 400.000 вакцини на АстраЗенека, на пет жени на возраст од 25 до 65 години досега им е дијагностицирана тромбоза во комбинација со низок број на крвни клетки, а една жена починала.

Сите пет жени развиле масовна белодробна емболија во рок од десет дена по вакцинирањето.

Во тек е испитување за да се утврди дали има врска меѓу вакцинацијата и тромбозите. Вакцинацијата на граѓани на возраст под 60 години ќе биде суспендирана до среда (7 април), кога се очекува нов детален извештај од Европската агенција за лекови (EMA), а холандската служба за контрола на лекови СГБ и министерството за здравство ќе ја преиспитаат употребата на  вакцината на АстраЗенека.

Германија уште во средата одлучи да вакцинира само лица над 60 години со АстраЗенека, додека Канада се одлучи таа граница да биде 55 години. 

Повеќе:

-Илјада причини „за“ и „против“ АстраЗенека

-Ковид-вакцини: Јојо со АстраЗенека и некои позитивни новости

-АстраЗенека: Да се спаси што може да се спаси

И здравствените власти во Велика Британија пријавија случаи на ретки тромбози по примањето на АстраЗенека, но не ја ограничуваат нејзината употреба. Напротив, недвосмислено советуваат да се продолжи вакцинацијата.

30 случаи на ретки згрутчувања на крвта се пријавени во Велика Британија од вкупно 18,1 милиони дози на вакцини администрирани во земјата. Ризикот некој да добие згрутчување на крвта по примање на вакцината е „многу мал“, спопшти британската регулаторна агенција за здравство и лекови (МХРА) 

Заклучно со 24 март, пријавени се вкупно 22 случаи на церебрална венска тромбоза и осум други видови тромбоза, се вели во извештајот на агенцијата. 

„Врз основа на овој тековен преглед, придобивките од вакцините против Ковид-19 продолжуваат да ги надминуваат сите ризици и треба да продолжите да ја примате вашата вакцина кога ќе бидете поканети да го сторите тоа “, апелираше МХРА.

Вкупно, повеќе од 31 милиони луѓе во Велика Британија ја имаат примено првата доза на ковид-вакцината, а кај повеќе од 18 милиони од нив, таа била АстраЗенека.