Атина очекува напредок по средбата Заев-Ципрас во Давос
23 јануари 2018
Грчката влада соопшти дека од средбата очекуваат напредок во спорот за името.
„Од состанокот очекуваме напредок во правец на изнаоѓање взаемно прифатливо решение“, изјави портпаролот на грчката влада Димитрис Ѕанакопулос.
„Решението мора да се најде врз база на сложено име, со географска или временска одредница, која ќе важи насекаде, ставајќи јасно до знаење дека никој не може да полага право врз земјата или историјата на други народи“, рече тој.
Во неделата во Солун се одржаа демонстрации против употребата на терминот Македонија во името на соседната земја. На чело на протестите беа националистички кругови и тврдокорни црковни претставници. Во грчката влада велат дека десно-радикалните и ултра-националистичките групи во земјата ги злоупотребуваат чувствата на граѓаните во однос на спорот.
„Недостатокот на решение е она што ги поткопува грчките интереси“, вели Ѕанакопулос. Официјална Атина смета дека масовноста на демонстрациите нема да игра никаква улога врз преговорите. Тоа во изјава го потврди и шефот на дипломатијата Никос Коѕиас. Тој потврди дека двете земји се приближиле во однос на некои прашања.
Заев и Ципрас претходно имаа телефонски разговор за време на новогодишните празници.
Во следните недели, според најавите во грчките медиуми, се очекува посета на медијаторот Метју Нимиц на Скопје и Атина.