Бундестагот ќе гласа за спасот на еврото

Поради големите финансиски ризици поврзани со спасот на еврото владејачката Христијанско демократската унија се реши да побара одобрение од сите пратеници, наместо само од Одборот за буџетски прашања. Во меѓувреме се множи бројот пратеници на владеачките партии, кои најавуваат отпор за предлозите на владата. Тие се движат во моментов во две насоки. Едната опција за проширување на фондот за спас ЕФСФ е средствата да служат за делумно осигурување на државните обврзници на презадолжените земји. А втората предвидува создавање на фонд со кредити, во кој ќе има и средства од Меѓународниот монетарен фонд. Експертите тврдат дека е можна и комбинација од двете варијанти.

Во секој случај за предлозите денеска ќе се расправа во Одборот за буџетски прашања и во собраниските групи. Пред утрешното гласање во пленумот канцеларката Ангела Меркел ќе поднесе владина изјава за курсот околу надминувањето на кризата на еврото. Потоа таа ќе отпатува за Брисел каде ќе се одржи продолжението на самитот на ЕУ, од кое се очекуваат конкретни мерки за спас на еврото.

Автор: ГЧ/ дв/ дпа/ дапд

Редактор: Александра Трајковска