Германија: Ембарго за руската нафта е прашање на денови

Во напорите за воведување натамошни санкции против Русија, воведувањето ембарго за руска нафта во ЕУ, според германскиот министер за економија, Роберт Хабек, е сѐ поизгледно.

Ембаргото стана прашање на блиска иднина, се очекува пробив за неколку дена, изјави министерот за Вториот канал на германскиот јавен сервис, ЦДФ.

Санкциите против  Русија,  воведени како последица на нејзината инвазија врз Украина, мора да добијат одобрување од сите 27 земји-членки на ЕУ. Некои од нив, првенствено  Унгарија,  се скептични кон  нафтеното ембарго  поради сопствената зависност од овој ресурс, брзата замена на испораките од Русија го сметаат за речиси неизводливо.  Будимпешта веќе се закани со можно вето против евентуалната мерка.

Хабек изрази разбирање за ваквите колебања, кон кои ЕУ мора да покаже обѕири. Можен излез од блокирањето на согласноста се гледа во разговорите за подолги преодни рокови за државите посебно зависни од руската нафта, со што би им се оставило можност да ја осигураат енергетската безедност на друг начин. Доколку ЕУ на ваков начин ѝ излезе во пресрет на Унгарија, тогаш би „требало нешто и таму да се случи“, предупредува Хабек.

Следниот самит на ЕУ е закажан за крајот на месецов, а со него и можноста за донесување одлука за ембарго за руската нафта. Истовремено ЕУ работи заедно со САД на воведување горна граница за цените на нафтата. Со оглед на тоа што цените по војната во Украина забележаа силен пораст, постои веројатност можното ембарго да ги вивне во досега невидени височини.

„Путин во последните недели продаде помалку нафта, а собра повеќе пари“, изјави Хабек. Оттаму идејата за барел нафта да не се прифаќа било која цена. Но, тоа би функционирало само ако многу држави учествуваат во ваквата стратегија, а тука уште има проблеми, истакнува германскиот министер за економија.