Тежок живот зад решетки - критики за условите во затворите

И покрај малите подобрувања, вклучително и реновирање на едното крило на истражниот оддел на Затворот Скопје и затворањето на три проблематични крила на затворот Идризово, сè уште има проблеми со условите за живот во затворите. Затворениците се затворени во нивните ќелии по 23 часа, без да прават ништо, а им се одбиваат и контактите со нивните деца. Ова се само дел од забелешките нотирани од Комитетот на Советот на Европа за спречување на тортура и нехуман или понижувачки третман или казна (КПТ), во најновиот извештај објавен во Стразбур.

-повеќе на темата: Тортура и корупција во македонските затвори

Комитетот за време на посетата на Северна Македонија од 7 до  9 декември 2020 година забележал тесни и нехигиенски услови за притвор во таканаречената единица „амбуланта“, во крилата со затворен режим на затворот „Идризово“ и во нереновирани крила на затворот „Скопје“. Затворениците, како што се вели, не добиваат квалитетна здравствена заштита поради неподготвеноста на Министерството за здравство да преземе повеќе „стратешки пристап“ при неговото работење. Комитетот забележува дека има недостиг на транспарентност во управувањето со затворите, а се нотира и загриженоста дека за назначување раководни лица во затворите е пресудна политичката припадност, а не способноста за извршување на таква комплексна задача. КПТ ги повикува властите да ги засилат напорите за борба против корупцијата на персоналот.

Подобрување на условите

Македонската влада на критиките од Стразбур одговара со конкретни планови за  реконструкција на дотраените обекти, со заложба за вработување нови кадри и нивна обука. Во писмениот одговор до Комитетот се најавува подобрување на условите во КПД Идризово и другите затвори, па така планирано е во текот на 2021 година да се реализираат инвестициски активности во вкупен износ од над 199 милиони денари. Се најавува реконструкција на дел од објектите, создавање на подобри услови за сместување на затворениците и притворените лица, издадени се наредби за подобрување на хигиената, а надлежните во затворите имаат добиено и упатства дека секој осуден мора да биде 2 часа на чист воздух во текот на денот. 

Насилство и корупција

КПТ наведува дека при посетите слушнале обвинувања за физичко малтретирање на осомничените за криминал од страна на полициски службеници и инспектори, поради што властите се повикуваат да го истражат тоа.

Во однос на забелешките, надлежните најавуваат поголеми контроли при влез и излез на сите вработени лица и посетители, а во Идризово се поставени и дополнителни безбедносни камери кои треба да го контролираат однесувањето на службените лица. Согласно податоците со кои располага Управата за извршување санкции, во текот на 2019 година биле поведени 10 постапки против припадници на затворска полиција (2 предмета се отстапени на друго надлежно ЈО, за 2 предмета се донесени одлуки и 6 предмети се во тек, односно се преземаат истражни дејствија). Во текот на 2020 година биле поведени 2 предмета против 5 лица –припадници на затворска полиција, кои се во фаза на истражни дејства.

-повеќе на темата: Репортажа: Нехуманите услови во македонските затвори

„Во однос на забелешките кои се однесуваат на коруптивните појави во установите, Управата за извршување санкции започна со редовни надзори во установите, а дополнително ги засили и вонредните надзори во затворите. Дополнително, по долги години, со асистенција на МВР и припадници на затворска полиција од друга КПУ, извршен е претрес во КПД Идризово во затвореното одделение на установата. Дополнително, со цел намалување на коруптивни дејства, во Затвор Скопје се засилени контроли на влез-излез во установата, а во скоро време се работи на поставување на единствена точка преку која ќе се врши и следи видео надзорот во установата, контрола на пратки и посетители од страна на посебно обучени припадници на затворска полиција“, се наведува во одговорот на македонските власти на забелешките на Комитетот.