И министерката за образование Царовска ја напушта владата

Се множат отказите во новата влада која треба да ја предводи новиот претседател на СДСМ, Димитар Ковачевски. Министерката за образование Мила Царовска во понеделникот најави дека нема да продолжи на функцијата во идната влада која треба да се формира во јануари. 

„Донесов одлука да не учествувам во новата влада со новиот мандатар. Во изминатите пет години заедно со мојот тим, испорачавме политики во интерес на граѓаните. Јас продолжувам да се борам и да се застапувам за истите вредности и за истите политики и навистина верувам во капацитетот и силата на државата како и силата на жените и младите“, изјави Царовска. 

Таа е министер за образование од август 2020 година, во втората влада на премиерот Зоран Заев. Претходно го предводеше Министерството за труд и социјала. 

Кој ќе остане во владата? 

Своето заминување од владата минатата недела го најави и министерката за одбрана Радмила Шекеринска. Таа објасни дека го изразила своето несогласување со политиките на СДСМ уште на почетокот на годината, кога се повлече од функцијата во партијата, но оттогаш ништо не се променило. 

„Тогаш најавив дека ќе се повлечам од раководството на СДСМ поради тоа што не се согласував со дел од политиките. И мислам, можеби сум субјективна, дека дел од тие политики придонесоа за поразот што го доживеавме на локалните избори“, рече Шекеринска. 

Во јавноста се вртат многу шпекулации за изгледот на новата влада на Ковачевски кој неодамна беше избран за нов претседател на СДСМ. Наводно, само Ковачевски во моментов знае кој ќе ги задржи функциите во власта од неговата партија, и одлуките во таа насока ќе ги носи самостојно. Првичните сигнали се дека идниот премиер сака целосно да ја освежи владата со нови министри, а од актуелниот состав веројатно ќе останат само еден или двајца министри.