Лажен аларм за корона-вирус во возовите кон Австрија

Австрија одеше на сигурно: од страв поради можно внесување на корона-вирус од Италија, вчеравечер беше запрен железничкиот сообраќај на преминот Бренер. Стотици патници чекаа со часови додека нешто пред полноќ не стигна веста дека возовите може да продолжат натаму.

Запирањето на возовите беше направено поради две жени со треска во еден воз кој се движел на релација Венеција-Минхен. Испитувањата меѓута покажале дека двете Германки немаат корона-вирус.

„Може да дадеме знак за крај на узбуната“, изјави австрискиот министер за внатрешни работи Карл Неамер. Сите институции во случајот реагирале со голема претпазливост, рече тој и најави дека денеска силите за брза интервенција треба да се договорат околу контролите на границата со Италија.

Драстични мерки

Италијанската влада на викендот најави дека сака да го запре брзото ширење на корона-вируст со помош на драстични мерки како карантини. Повеќе општини во северна Италија се изолирани за вирусот да не се префрли во Милано, Венеција и други региони. Карневалот во Венеција е прекинат предвреме, а откажани се и спортски манифестации. Училиштата и музеите во погодените региони засега остануваат затворени.

Италија е земја со најголем број на потврдени случаи на белодробното заболување COVID-19 во Европа - 150. Центар на епидемијата е гратчето Кодоњо во Ломбардија, кое има 15.000 жители. Таму вирусот најверојатно бил раширен од вработен во концернот Унилевер. 38-годишникот ја заразил и сопругата која е во висока бременост, како и фудбалските другари и медицински персонал. 

Друго жариште е селото Во'Еуганео, во регионот Венето. Таму во петокот 78-годишен маж почина од болеста предизвикана од корона-вирусот. Тој е првиот Европеец жртва на белодробното заболување COVID-19. Во саботата почина и старица во близина на Кодоњо, а вчера е соопштено дека починала и 78-годишна пациентка со рак во Ломбардија. Во меѓувреме, според италијанските медиуми, во северна Италија има и четврта жртва од болеста.

Пекинг го одложи Народниот конгрес

Ескперти на Светската здравствена организација сметаат дека давањето прогнози за развојот на епидемијата во светот во моментов се неупатни, затоа што бројот на заболени надвор од границите на Кина е делумно драстично зголемен. Многу луѓе се заразени без притоа да биле во Кина или да имале контакти со луѓе кај кои е докажано присуство на корона-вирусот, напиша генералниот директор на СЗО, Тедрос Аданом Гебрејесус на Твитер.

Кина, според наводи на државните медиуми, поради болеста COVID-19, од која во меѓувреме заболеа над 77.000 луѓе, и официјално го одложи одржувањето на Националниот народен конгрес. Нов термин за пленарната седница, која требаше да се одржи на 5 март, не е наведен. Ова е првпат во поновата историја на Кина да се одлага седница на Народниот конгрес.