Кампањата без митинзи, здравјето на граѓаните на прво место

Лидерите на водечките политички партии во земјата и техничкиот премиер Оливер Спасовски денеска ги повикаа граѓаните да не подлегнуваат на паника и да се однесуваат одговорно поради опасноста од новиот коронавирус.
Политичарите не гледаат потреба за одложување на предвремените парламентарни избори закажани за 12 април, но загрижени се за можните последици кои пандемијата може да ги остави врз економијата.

„Здравјето и животот на граѓаните е над сe, но и грижата за економијата

исто така. Имаме стабилна фискална политика, меѓутоа, ако тоа биде потребно, треба да се стават сите институции на располагање“, рече Спасовски, додавајќи дека доколку има потреба може да се свика и Собранието.

Сите политички партии, според Спасовски, се договориле постојано да се повикува на стопирање на пласирањето лажни вести.

Претседателот на опозициската ВМРО-ДПМНЕ, Христијан Мицкоски рече дека состанокот бил од информативен карактер и изрази загриженост за последиците врз економијата.
„Покрај справувањето со ковид-19, од големо значење ќе биде како ќе се справиме со економските последици кои неминовно ќе дојдат по коронавирусот, Македонија не може да биде имуна, тоа ќе го почувствува и буџетот“, рече Мицкоски. И Мицкоски, како и лидерот на Беса, Биљал Касами изјавија дека ќе ја почитуваат забраната за организирање јавни митинзи и предизборната кампања ќе ја водат со алтернативни методи.
Лидерот на Алијансата за Албанците, Зијадин Села на граѓаните им порача да бидат мирни бидејќи ситуацијата со коронавирусот ќе помине како и секој друг сезонски грип. Сепак, тој е незадоволен од менаџирањето на кризата од страна на министерот за здравство Венко Филипче. Премиерот Спасовски подоцна ги отфрли критиките.

Претседателот на СДСМ, Зоран Заев средбата со лидерите на останатите партии ја оцени како конструктивна.

„Добро е што сите сме заедно кога во прашање е заштита на здравјето на

граѓаните. Апелирам до сите политички партии да не мрднеме ни милиметар од препораките на Министерството за здравство. Уверен сум дека заедно оваа состојба ќе биде набрзо надмината“, рече Заев.