Културна трагедија во Грција

Теодор Теркопулос, директор на театарот „Атис“ на сцената го поставува „Прометеј“. Дури и најугледниот режисер во Грција оваа година мора да се снајдe со помалку пари. Со помош на театарот тој сака да ги истражи причините за економската криза:

„Се поставува прашањето за каква криза станува збор? Криза на луѓето или криза на материјалното? Чија криза - на просперитетот? Каква криза? Најважно е прашањето каде се наоѓа коренот на проблемот.“

Непримерен луксуз и корупција

Драмскиот текст прикажува луѓе кои постојано се во одбранбен став, без потпора, во состојба на основна несигурност. Тоа е огледало на пропаѓањето на една класа, која живеела добро без сопствена заслуга:

„Јас мислам дека оваа криза мора да оди подлабоко... Тоа значи дека овие луѓе мора да паднат, со своите вили, џипови...Тоа е некоја псевдо средна класа. Tаа класа мора да ја сфати сегашната ситуација. Ако во таа класа се наоѓа мнозинството граѓани, тогаш можеби постои надеж за иднината“.

Кризата стигна и до елитната атинска населба Колонаки. Популарните кафулиња се празни. Се’ повеќе продавници се затвораат. Факт е дека голем број Грци со години живееја над своите можности. Сега сите говорат за непримерен луксуз и корупција. Со таа тема за занимава и театарот. Германскиот режисер Даниел Вецел на сцената доведе сто граѓани на Атина од различни социјални слоеви. Сите говорат за своите лични судбини и ставови. Што на пример очекува Јанис, кој работи во службата за обезбедување на еден затвор?

„Јас се надевам дека сите кои се наоѓаат на сцената ќе го кажат своето политичко мислење.“

Или Ана, која им помага на жртвите од сексуално насилство:

„Нормално дека е необична идејата на театарските творци на сцената да направат пресек на жителот на Атина. Разуздани луѓе, жртви политичари, поети. Тоа ќе биде еден вид арена.“

Преку театарот до решенија

Стотината избрани граѓани ќе стојат во амфитеатрот пред петстотини гледачи. Значи, театарот е како демократски форум, каде се говори јасно и искрено.

„Тоа е некој вид огледало на самоперцепцијата која, се разбира, со себе носи ризик размислувањата на граѓаните да бидат многу остри, но тоа дава и можност да се види каде се точките на согласување, а каде точките на раздвојување и каде поединците се издвојуваат“, вели режисерот Даниел Вецел.

Мариа Серву, уметничка која живее во Амстердам и од дистанца ја набљудува својата татковина, сега на Пелопонез го снима својот нов видео проект:

„Она што се случува тука е екстремно. Тоа е шок за сите. Ова е свртување од натапканиот пат. Се’ уште не знам како сето ова ќе влијае врз нас“.

Мариа Серву смета дека Грците се подготвени на промени:

„Ние за овој проект говориме како за заеднички проект и тоа е многу добро, затоа што заедно се обидуваме да најдеме решение за актуелните проблеми“.

Автор: Андреа Касиске / Симе Недевски

Редактор: Елизабета Милошевска Фиданоска