НАТО наскоро со 30 членки

И покрај конфликтот околу буџетот за одбрана, шефовите на држави и влади на земјите членки на НАТО ќе ѝ доделат покана за членство на Македонија. Тоа го овозможи компромисот во деценискиот спор за името со соседна Грција. Со него, балканската земја со 2,1 милиони жители за една до две години ќе стане 30. членка на НАТО со идното име „Република Северна Македонија“.

Претходно договорот со Грција ќе мора да биде целосно спроведен. Парламентот во Скопје веќе го одобри, но недостасува и референдум за промена на македонскиот Устав. Тој ќе се одржи во септември или октомври. Дури потоа ќе дојде зеленото светло од грчкиот парламент.

Грција го блокираше членството на Македонија во НАТО и ЕУ поради спорот за името. Од крајот на Студената војна, 13 држави станаа членки на воената алијанса. Повеќето од нив доаѓаат од сферата на влијание на поранешниот СССР. Додека во првите години по падот на Железната завеса Москва соработуваше со НАТО, брзото проширување на Алијансата кон исток ги оптовари тие односи.

Последната земја која влезе во НАТО во јуни 2017 беше Црна Гора. Откако земјата доби покана во 2015 година, Москва се закани со контрамерки. Црногорското обвинителство утврди дека „руските државни органи“ биле вмешани во неуспешниот обид за пуч во октомври 2016 година. Оттука, во НАТО постои стравување дека Москва пред референдумот би можела да ги поддржи противниците на решението на спорот за името.

Пред Црна Гора, во 2009 година членки на НАТО станаа Хрватска и Албанија. Во 2004 проширувањето ги опфати Бугарија, Естонија, Летонија, Литванија, Романија, Словачка и Словенија. Чешка, Полска и Унгарија во 1999 година беа првите земји од поранешниот источен блок кои влегоа во воениот сојуз.