Португалија не очекува блокади од Бугарија на патот кон ЕУ

Португалскиот министер за надворешни работи, Гомес Кравињо, не очекува во преговорите на Северна Македонија со ЕУ повторно да се покрене билатералното прашање со Бугарија. Тој на заедничката прес-конференција во Скопје со шефот на македонската дипломатија, Бујар Османи, порача дека е направен важен чекор напред, а постигнатиот договор околу францускиот предлог, ќе овозможи да започне скриниг-процесот, кој е интензивен и има две фази.

„Мислам дека од суштинско значење во меѓународните односи и политика e да веруваме на дадениот збор и на преземената обврска. Билатералното прашање за кое интензивно разговараат Северна Македонија и Бугарија е заокружено, има заклучок и заокружувањето на тоа прашање беше одбележано со меѓувладина конференција на 19 јули. Не очекувам ова прашање повторно да се покрене. Верувам  кога нашите партнери ќе дадат збор - дека тоа и ќе го исполнат. Ако почнат блокади, без оглед на тоа што е договорено, ќе се парализира целото функционирање“, вели Кравињо.

Министерот за надворешни работи, Бујар Османи, на прес конференцијата рече дека  Бугарија уште во 2017 година испратила унилатерална изјава за македонскиот јазик во ОН, но јавноста воопшто не била известена за тоа.

„Унилатерална нота за македонскиот јазик со иста содржина Бугарија има испратено  во 2017 година во Обединетите нации, веднаш штом се потпиша Преспанскиот договор и веднаш штом се впиша македонскиот јазик во картата на светските јазици. Но, за тоа не била известена јавноста кај нас. Сега се прави тоа и во ЕУ,  каде што за првпат ја пратиле таа нота во 2018 година, но нема никакво правно значење, бидејќи Софија гласаше за Преговарачката рамка во која нашиот јазик е чист“, дециден е Османи.

Референдумско прашање

Во однос на барањето на опозициската ВМРО-ДПМНЕ за одржување референдум за преговарачката рамка со ЕУ, Османи вели дека, според него, единствено логично прашање на тој референдум би било „Дали сте за стопирање на европскиот пат на Северна Македонија, притоа загрозувајќи го македонскиот јазик во Унијата“. „Друга  причина за референдум не гледам“, вели Османи, додавајќи: 

„Доколку е некој за запирање на европското пристапување, за влегување во некоја друга унија - Евроазиската, тогаш е легитимно за тоа да се прашаат граѓаните. Бидејќи вака, како што е сега, сите прашања што се важни за нас се обезбедени - македонскиот јазик е чист, имаме почеток на преговори и историските прашања не се одредница за отворање и за затворање на поглавјата од преговорите и имаме почеток на преговори“, рече Османи.