Бајден повторно ја спушти рампата за влез на патници

Во САД останува во сила од март воведената забрана за влез во земјата на патници од голем дел од Европската унија и Велика Британија, соопшти претставик на Белата куќа. Исто така продолжува и забраната за влез на луѓе во САД од Бразил, мерка воведена во мај ланската година. Новиот американски претседател Џо Бајден планира спуштање на влезната рампа и за патниците од Јужна Африка, со исклучок на американските граѓани кои се враќаат оттаму.

Одлуката на Бајден не е изненадување. Откако неговиот претходник на функцијата, Доналд Трамп минатата недела како еден од своите последни потези во својот мандат потпиша декрет за укинување на забраната за влез на патници од ЕУ и Велика Британија, Бајден веќе се изјасни против таквиот чекор. Декретот на Трамп требаше да почне да важи од утре.

Повеќе:

Бајден: „Сега мора да дејствуваме!“

Фотографија на денот: Во редица за тест за Ковид-19

На Трамп му се смачило од „Фаучи и сите тие идиоти“

Трамп спушти рампа за патниците од Европа

Значи, границите на САД остануваат и натаму затворени за патниците од споменатите земји. Причина се новите, уште позаразни мутации на коронавирусот, првпат регистрирани во Велика Британија и во Јужна Африка, а во меѓувреме потврдени и во одделни држави од ЕУ, меѓу кои и во Германија.

Новиот сој на коронавирусот со ознака Б.1.1.7, идентификуван од британските научници, веќе се има појавено во 20 американски сојузни држави, додека мутацијата од Јужна Африка досега не е пронајдена во САД.

Новите воведени забрани за влез во САД се дел од цела серија рестрикции за ограничување на ширењето на пандемијата на коронавирус која ја воведува Бајден, а која предвидува и задолжителен карантин за оние кои ќе допатуваат во земјата од странство.