Трамп размислува за иселување од Белата куќа
27 ноември 2020
Речиси три недели по поразот на претседателските избори, републиканецот Доналд Трамп навести повлекување од Белата куќа. На Денот на благодарноста, вчера пред новинарите Трамп изјави дека ќе ја напушти Белата куќа доколку Изборниот колегиум го изгласа неговиот демократски противкандидат Џо Бајден за иден претседател. Но, со оглед на „масивните изборни измами", тој и натаму смета дека гласањето за Бајден би било грешка.
74-годишниот актуелен претседател беше искрен – признавањето пораз би му било многу тешко, а го погодува и го смета за неисправно тоа што Бајден веќе го составува својот кабинет. Ова е првпат по 3 ноември Трамп да одговара на прашања на новинарите.
Повеќе на темата:
Пред заминување, Трамп го помилува екс-советникот Флин
Трамп малку попушти - го започна процесот на пренос на власта
Образложувајжи го своето тврдење за наводна изборна измама, Трамп избирачката структура во САД ја стави на исто рамниште со „земји од третиот свет". Гласале и мртви, упорно настојува тој: „Овие избори беа измама, тие беа фалсификувани", а за тоа се одговорни корумпирани службеници во одделни клучни сојузни држави како Пенсилванија и Мичиген, кои му го донесоа поразот, тврди Трамп.
78-годишниот Бајден според сегашната состојба по пребројувањето на гласовите може да смета на 306 електорски гласови, значително повеќе од доволните 270, додека Трамп има добиено 232 електорски гласа.
Изборниот колегиум треба да изврши избор на идниот американски претседател на 14 декември, но резултатот од изјаснувањето ќе биде соопштен пред Конгресот дури на 6 јануари идната година. Двата чекори во меѓувреме се сметаат за формални, со оглед на познатите резултати. Бајден треба на 20 јануари официјално да положи заклетва како нов претседател на САД.