Italen Schulden

Што мора итно да се случи за еврозоната да излезе од акутната опасност во која се наоѓа? Експертот за финансии и советник на германската влада Клеменс Фојст советува: „Според мое мислење, прво е потребен порешителен ’рез’ на долговите на Грција, а и на Португалија. Се‘ за што досега се дискутира не е доволно. Тој мора да е поголем, околу 70 проценти или повеќе.“

Со помалку долгови и повеќе реформи на двете земји би можело да им успее да почнат одново. Во случајот на Италија се работи пред се‘ за доверба, смета професорот по економија на универзитетот Оксфорд, Фојст: „Ако се погледне финансискиот план на Италија, може да се види дека до 2013 година треба да се постигне порамнување на буџетот. Тоа е дури подобро од Германија. Само проблемот е тоа што финансиските пазари очигледно не веруваат во овие бројки.“

Наредниот чекор, според Фојст, би требало да биде обезбедување поголема транспарентност: „Да се покаже дека никаде не се крие ништо, односно дека државните финансии навистина се такви како што се претставени.“

Купување италијански обврзници од страна на ЕЦБ би било „смртно опасно“?

Фојст предлага основање независна институција за буџет. Тоа би можело да се направи веднаш и такво нешто би ги убедило инвеститорите повеќе отколку некаков набрзина договорен пакет мерки за штедење. Сепак, кратењето на државните издатоци не може да се избегне: „Она што сега е важно е да се врати релацијата меѓу државното задолжување и брутодомашниот производ, а тоа е можно само преку порамнување на буџетот. Значи, да не се прават нови долгови, а истовремено да се бележи номинален пораст“, објаснува Алфонс Вајхенридер од универзитетот во Франкфурт.

Со оглед на тоа што порастот во Италија каска зад просекот во еврозоната, земјата ќе мора да спроведе и болни реформи на пазарот на работна сила. Додека тоа вроди со плод, меѓутоа, веројатно ќе минат години. Освен тоа, постои опасност и ветувањата што ги даде новиот премиер Марио Монти да бидат заобиколувани од неговите наследници. Затоа се‘ повеќе германски економисти пледираат за тоа Европската централна банка да смее да купува државни обврзници во неограничен обем. Алфонс Вајхенридер, е против: „Тоа би било давање зелено светло Италијанците да си продолжат како досега. Проблемот е во тоа што Италијанците се премалку свесни за проблемите. Да се испрати сигнал дека ЕЦБ може да купува италијански државни обврзници директно на примарниот пазар, би било убиствено.“

Досега ЕЦБ има купено обврзници во износ од 190 милијарди евра, главно грчки и италијански, за на тој начин да се одржат каматите на подносливо ниво. Ако сега биде најавено дека нема да се дозволи каматите на италијанските обврзници да пораснат над пет или шест проценти, тоа веднаш би ги смирило финансиските пазари, но истовремено тоа би значело намалување на притисокот врз Италија и другите слични земји за спроведување реформи, вели експертот Клемент Фојст.

Автор: Џанг Данхонг/ Елизабета Милошевска Фиданоска

Редактор: Александра Трајковска