بريتانوي پوځي سپي د هلمند ماموريت له کبله مډال وګاټه
۱۴۰۰ اسفند ۴, چهارشنبه
د PDSA د حيواناتو د ژغورنې ټولنې د ديکين په نوم دغه مډال، هېرڅ ته ورکړل شو چې يو لس کلن جرمنی د لنډو وېښتو پوينتر سپی دی. هغه اوس متقاعد دی، خو په ۲۰۱۳م کال کې يې له بريتانوي او ائتلافي ځواکونو سره د کار او د هغوی د ژغورنې له امله مډال خپل کړی دی.
هېرڅ د بريتانيا د پوځ په تاريخ کې لومړنی سپی دی چې د ګرځنده تليفونونو په ګډون د مخابراتو د الکترونيکي سامان آلاتو د کشف له پاره روزل شوی وو چې د PDSA د يوه بيان په حواله »د خدمت کوونکو کسانو، ښځو او ملکيانو ژوند ته يې خورا ډېر ګواښ پېښاوه.«
د PSDA عمومي رئيس، جان مک لګلين وويل چې »د هغه استثنايي وړتياوو بې له شکه ځواکونه د ديجيتالي استخباراتو له پر له پسې پرمختګونو څخه ژغورل.« د هغه په خبره »د هغه کړنو د بې شمېره ماموريتونو لوری بدل کړ، چې د پوځي پرسونل او ملکيانو ژوند يې وژغوره.«
هېرڅ ته جايزه د مرکزي لندن په RAF کلب کې د مراسمو په ترڅ کې ورکړل شوه. په کرواشيا کې زېږېدلي هېرڅ د RAF پوليسي واحد سره په کوچني والي کې يو ځای شو وروسته له هغه چې د مخدره موادو په کشف کې يې استثنايي وړتيا ښکاره کړې وه. پوځ د بريتانيا د زندانونو له څانګې څخه مرسته وغوښته چې د الکترونيکي سامان آلاتو د موندلو له پاره له سپو څخه کار اخلي. هېرڅ او د هغه روزونکی، افسر جاناتن تېنر، په هلمند ولايت کې د بريتانيا په کمپ باستين کې په ماموريت ګمارل شوي ول چېرته چې هېرڅ د دغې اډې له »دباندې او دننې څخه د بريدونو مخه نيوله.«
د PDSA ټولنې دا هم ويلي چې »ډېر هغه شيان چې ده به موندل، په مستقيم ډول د بالقوه ګواښونو او بريدونو په هکله د معلوماتو ټولولو پايله درلوده« او دا چې »د هغه وړتيا چې احتمالاً خطرناک شيان يې له صحنې ايستل بې له شکه د ډېرو کسانو ژوند ژغورلی دی.«
په هغو ۱۳ مياشتو کې چې هېرڅ په خپله دنده بوخت وو، د هلمند پر باستين کمپ باندې هيڅ د توغنديو بريد نه وو تر سره شوی. د RAF د ګروپ کاپيتان راس فوستر جونز وويل چې »هغه بې ساری دی او د هغه کيسه ښيي چې حيوانات زموږ وسله والو ځواکونو ته څومره اهميت لري او دا چې هغه د ژوند په ژغورلو کې کليدي رول لوبوي.«
د PSDA ټولنې د ديکين مډال له دويم نړيوال جنګ راهيسې هغو حيواناتو ته ورکول کيږي چې په جګړه يزو ماموريتونو کې يې استثنايي زړورتيا او امانت کاري ښودلې وي. هغه په خپل ډول تر ټولو لوړ مډال دی. د PSDA بنسټګرې ماريا ديکين دغه مډال په لومړي ځل په ۱۹۴۳م کال کې ووېشه چې له هغه وخت راهيسې اوس ۳۷ سپيانو، ۳۲ کوترو، څلور آسونو او يوې پيشو ته ورکړل شوی دی.
زموږ له آرشيف څخه: