د ايران د ملي بانک له څانګې د امانتونو ۲۵۰ صندوقونه غلا شوي
۱۴۰۱ خرداد ۱۷, سهشنبه
د ايران د دولتي تلویزيون د رپوټونو په حواله د دې پېښې په ترڅ کې د غلو يوې ډلې په تهران کې له امانتي صندوقونو څخه د غلا په موخه چې د بانک په تهکاوۍ کې ځای پر ځای وو، په خوا کې له پرتې ودانۍ څخه استفاده کړې وه او د دغه ودانۍ له لارې بانک ته داخل شوي ول.
پېښه هغه مهال رامنځته شوې ده چې بانک د درې ورځنیو رخصتيو په ترڅ کې بند وو.
د لوټل شوې شتمنۍ اندازه نه ده ښوول شوې
د معلوماتو له مخې غلو د بانک د څنګ ودانۍ له لارې د بانک ديوال سوری کړی او هغه خونې ته یې ځان سولی دی چې دغه صندوقونه پکې ځای پر ځای شوي ول. د رسنيو د رپوټونو په حواله غلو ۲۵۰ امانتي يا سيف ديپازيت باکسونه له ځانه سره وړي دي. دغه بانک د ايران ملي بانک يوه ستره څانګه ده.
په امريکا کي يوه سړي بانک وهلی او پيسې يې پر خلکو وېشلي
د ایران دولتي تلويزيون په خپلو رپوټونو کې دا نه دي ويلي چې په دغو صندوقونو کې کوم ډول ګران بيه توکي ول او ارزښت یې څومره وو. د ايران ملي بانک تر دغي پېښې وروسته د دوشنبې په ورځ (۲۰۲۲م کال جون ۶) په خپله يوه اعلاميه کې ويلي چې د دې غلا له کبله يوازې «محدود زيان» رسېدلی دی.
د بانک منيجر د خطر زنګ له پامه غورځولی وو
د ايران نيمه دولتي خبري آژانس مهر نيوز ويلي دي، کله چې غلو د بانک ديوال سوری کړ نو هغه وخت د خطر زنګ وغږيد چې له لارې یې د بانک منيجر ته هم خبرداری رسېدلی وو. خو د بانک منيجر زنګ له دې کبله له پامه غورځولی وو چې تر دې وړاندې هم دا زنګ په غلطۍ غږيدلی وو.
د مهر خبري آژانس په حواله د بانک د خطر د زنګ سیسټم داسې نه دی عیار شوی چې د خطر په صورت کې په اتوماتيکه توګه سيمه ایزو پوليسو ته خبر ورکړل شي.
د تهران دا بانک چې غلا پکې شوې ده، د ښار د يوه ستر سړک پر غاړه پروت دی او له پوهنتون او د پوليسو له يوه مرکز سره نزدې موقعيت لري.
په ايران کې د بانک د لوټ کیدو پېښې ډېرې لږ رامنځته کيږي. تر دې پېښې وروسته پوليسو له شکمنو کسانو څخه پوښتنې ګرويږنې پېل کړي دي چې د بانک ځيني کارکوونکي هم پکې شامل دي.
ب. ص/ ن. ز (AP)
زموږ له آرشيف څخه: