د مقدونیا، سکوپیه ښار: د اروپا تر ټولو ککړ ښار ته ښه راغلاست

د رسمي شمیرو له مخې د مقدونیا په پلازمینه کې په کلني ډول تر ۱۳ سوه ډیر انسانان د هوا د ککړتیا له امله تر وخت مخکې خپل ژوند له لاسه ورکوي. د اروپايي ټولنې د ټاکل شوو معیارونو برعکس، په سکوپیه کې د ککړې هوا کچه لس برابره زياته ده.

د هوا د ککړتیا ستونزه په هر ژمي کې د صنعتي ګلخانه ايي ګازونو، د لرګیو د سون او د زړو موټرو له امله پراخیږي. اوس د هوا له ککړتیا سره د مبارزې له پاره، د مقدونیا چارواکو بیړني اقدامات کړي. د تګ راتګ عامه ترانسپورت د لنډ وخت له پاره د هر چا له پاره وړیا دی. میندواره میرمني او تر۶۰ کلنۍ اوښتي کسان اړ نه دي چې کار وکړي.

په سکوپیا کې د عامه ترانسپورت سیستم معیاري نه دی او یوازي بسونه پکې فعالیت کوي. ددغو بسونه ډېر يې د چاپیریال پر معیارونو هم برابر نه دي. په ورته وخت کې بایسکل هم له دې امله ډیر کم کارول کیږي، ځکه په دې ښار کې اساسي بنسټونه نه شته او همدا راز د سړک د ترافیک د فرهنګ د نه شتون له امله بایسکل چلول هم له خطره خالي نه دي. په دې ښار کې تقریقا هره ورځ د بایسکل د ټکر یوه پیښه رامنځ ته کیږي.

ځايي رسنیو رپوټ ورکړی چې په سکوپیه کې ځینې دوکانونه د هوا د ککړتیا ضد د ماسکونو له کمښت سره مخ دي. ځایې غیر دولتي سازمانونو هم خبرداری ورکړی چې د هوا د ککړتیا کچه د کال د اوسط کچې څخه لوړه ده. دوی خبرداری ورکړی او له حکومت او ځايي چارواکو یې غوښتي دي چې په اوږده مهال کې د هوا د کیفیت د ښه کولو له پاره دې د ځینو اقدماتو له پاره سبسایډی ورکړي.

په آلمان کې د هوا د ککړتیا په برخه کې تر ټولو ککړ ښار، شتوت ګارت هغه وخت خبرداری ورکړی وو چې په هر مترمربع کې د هوا د ککړتیا د زرو کچه ۸۰ مایکروګرامه ته رسیدلی وه. په سکوپیه کې د ژمي د مياشتو په اوږدو کې بیا د هوا ککړتیا کچه شاوخوا ۲۰۰ ته رسیدلې او ان تر ټولو لوړې کچې یعنې ۶۰۰ ته هم رسیدلی.

په مقدونیا کې د هوا ککړتیا ډیره شوې، په سکوپیه کې د امریکا سفارت د تویتر له لارې په دې هکله نظرونه غوښتي. د امریکا سفارت لیکلي: «نن په سکوپیه کې هوا ډیره ککړه وه، په مشکل سره سفارت لیدل کیږي! په مقدونیا کې د هوا د پاکوالي له پاره تاسې څه نظر لرئ؟» دا د حیرانتیا وړ نه ده چې په مقدونیا کې د امریکا او یا اروپايي سفارتونه په دې راز عامه کارونو لاس پورې کوي، خوا دا ځل ځواب له مسکوه راغلی...

دا چې د امریکا په سفارت کې زموږ ملګري د هوا د ککړتیا له پاره د نظرونو غوښتنه کړې، نو موږ غواړو د حل په برخه کې مرسته وکړو. حل *ترکش ستریم» دی. ترکیش ستریم د روسیې د ګازو نل لیکه ده چې د بشپړیدو په صورت کې به له ترکیې پیل، یونان او بیا د مقدونیا له لارې نورو اروپايي هیوادونو ته ورسیږي. امریکا په سیمه کې د انرژي د لیږد د نورو الترنتیفونو په لټه کې دی.

دا چې سکوپیه په یوه دره کې موقعیت لري او غرونو له درې اړخونو پرې راچاپیر دي، د دې ښار اوسیدونکو ته د هوا له ککړتیا څخه د تیښتې یوازنی لار، په ژمي کې اوچتو سیمو ته پناه وړل دي. د پاکې هوا ترڅنګ خلک کولی شي په دې سیمو کې له خپلو حيواناتو سره د ښکلو منظرو لیدنه هم وکړي.