د نړۍ مهم خبرونه په متن او انځور کې

روسيې د مسموم شوي پخواني جاسوس، سرګي سکريپال، په قضيه کې د «او پي سي ډبل يو» د کيمياوي وسلو پر نړيوالو کارپوهانو د لاسوهنې سخت انتقادونه کړي دي. د روسيې د بهرنيو چارو وزير، سرګي لاوروف په مسکو کې وويل چې مسکو د سويس د يوه داسې لابرواتوار يو سند تر لاسه کړی چې د اعصابو د استعمال شويو زهرو په هکله تحقيقات کوي. د لاوروف په حواله يې د «بي زېډ» په نوم زهر موندلي دي، چې په روسيې پورې اړه نه لري.

د آلمان ولسمشر، فرانک والتر شتاينماير د روسيې او لويديځ تر منځ د «خطرناکې فاصلې د نيولو» له کبله اندېښنه ښودلې او په دواړو لورو باندې يې د ديالوګ او خبرو اترو د تر سره کولو غږ کړی دی. شتاينماير د «بيلد ام زونتاګ» ورځپاڼې ته وويل چې د اوسنيو ترينګلتياو پايلې په بريتانيا کې د مسموم شوي ډبل جاسوس، سرګي سکريپال، له قضيې څخه لا ډېر وړاندې ځي. د هغه په خبره «تقريبا د اعتماد هيڅ بنياد» نور وجود نه لري.

په سوريه کې پر هفدونو باندې له مشترک توغنديزو بريدونو وروسته د امريکا متحده آيالاتو، فرانسې او بريتانيې په يوه ديپلوماتيک اقدام لاس پورې کړی دی. دغو درېو هېوادونو د ملګرو ملتونو د امنيت شورا ته د زهرجن ګاز په هکله د اتهاماتو په هکله د يو نوي پرېکړه ليک له پاره مسوده وړاندې کړه. د فرانسې له خوا ليکل شوې مسوده کې د دوما شکمن کيمياوي بريد په هکله د څېړنو لپاره د يو «بې طرفانه مکانيزم» وړانديز شوی دی.

دا چې د «پريوېنت ګروپ» په نوم يوه بوسنيايي شرکت د يوې خپلمنځۍ لانجې له کبله د موټر جوړولو شرکت فولکسواګن ته خپل اکمالات درولي ول، نو فولکسواګن ته په ۲۰۱۶ کال کې د سوونو ميليونو يورو په مقدار زيان واوښت. د «بيل ام زونتاګ» ورځپاڼې په حواله د موټرو شرکت په دې پسې خورا د سوال وړ متودونو ته لاس واچاوه. ويل کيږي چې په برلين کې مېشت يوه امنيتي شرکت ته يې ښايي وظيفه ورکړې وي چې ۳۷ «هدفي کسان» دې وڅاري.

د کيڼ ګوند فراکسيون په خپل يوه پنځه صفحه يي کاغذ کې د آلمان د پارلمان د جوړښتونو په برخه کې ژور اصلاحات غوښتي. د فراکسيون اجرائيوي رئيس، يان کورته، دا وړانديز هم کوي چې وړو فراکسيونو ته د زياتو خبرو وخت ورکړل او د بېلابېلو پلاوو ناستې په انترنېټ کې خپرې شي. د آلمان صدراعظمه او وزيران بايد پارلمان ته په دوامداره شکل جواب ووايي چې دغه کار حد اقل يو وارې په هرو درېو مياشتو کې صورت نيسي.

د آدريا سمندر ته پروت په واړه هېواد، مونته نېګرو کې پر ۵۴۰ زرو رايه ورکوونکو غږ شوی دی چې نوی ولسمشر دې وټاکي. مخکښه ښايي پکې د ډېرې مودې او پخوانی حکومتي مشر، ميلو جوکانوويچ، وي. دغه ۵۶ کلن سياستوال تقريبا د ۲۵ کلونو راهيسې د مونته نېګرو تر ټولو اغېزلرونکې سياسي څېره ده. مخالفين ورباندې د مطلق العنانه رفتار، اداري فساد، بډو اخيستلو او له منظمو جرمونو سره د تړاو لرلو تورونه لګوي.

په ټوله نړۍ کې د چاپېرل د تخريب له کبله يوه مشهور امريکايي د مدافع وکيل، ډيويډ باکل، خپل ځان سوځولی دی. لارويانو د دغه ۶۰ کلن سړي مړی د نيو يارک په بروکلين ناحيه د پروسپکت په پارک کې موندلی دی. له هغه څخه د خدای پامانۍ په منظور يو خط پاته دی چې بېلابېلو رسنيو ته يې لېږلی و. په دغه ليک کې باکل انتقاد کړی دی چې «ککړتيا زموږ د ځمکې کُره ويجاړوي، هوا خرابوي، ځمکې او اوبو ته ضرر رسوي.»

د مالي په تيمبوکتو ښار کې د ملګرو ملتونو په يوې اډې باندې د يوې حملې په ترڅ کې يو شين خولی عسکر وژل شوی او دولس نور تنه ټپيان شوي دي. د ملګرو ملتونو د «مينوسما» ماموريت ويلي دي چې اډه يې په لاسي بمونو او د يوه ځانمرګي له خوا د موټر په واسطه تر بريد لاندې راغلې ده. عسکرو او بريدکوونکو يو پر بل باندې ډزې کړې دي. د يوه امنيتي کس په حواله په شين خولو عسکرو باندې دغه راز يو بريد «بې ساری» دی.