د پاکستان پوځ وايي د طالبانو په ډزو ۷ کسان وژل شوي
۱۴۰۱ آذر ۲۱, دوشنبه
په چمن کې د يکشنبې ورځې پېښه د یو لړ تاوتريخوالو په ادامه رامنځ ته شوې کوم چې په افغانستان کې د طالب واکمنانو او اسلام آباد تر منځ د مناسباتو د خړ پړ کېدو سبب واقع شوي دي.
په نومبر میاشت کې هم په چمن سرحد کې یو خونړی برید وشو چې په نتيجه کې ېې سرحدي دروازه د ۷ ورځو له پاره وتړل شوه او د پولې دواړو خواوو ته په زرونو خلک بند پاتې شول او سوداګرو ته درانه مالي زیانونه واوښتل.
سپين بولدک: د طالبانو او پاکستاني عسکرو نښتې درنه مرګ ژوبله اړولې
چمن د افغانستان او پاکستان تر منځ د سوداګرۍ مالونو د ليږد رالیږد یو مهم سرحد دی. چارواکو ويلي دي چې دغه لاره د دوشنبې په ورځ سهار وختي بېرته خلاصه شوې ده.
د پاکستان د پوځ مطبوعاتي څانګې په لومړي سر کې ویلي وو چې د يکشنبې ورځې په ډزو کې ۶ کسان وژل شوي، خو وروسته دغه شمیر ۷ ته پورته شو. پوځ زیاته کړې چې ۱۶ کسان ټپیان شوي هم دي. د پاکستان پوځ ادعا کړې چې دغه مرګ ژوبله ملکيانو باندې د افغان طالب ځواکونو د «بې دليله او بې بنسټه ډزو» له کبله رامنځ ته شوې چې پکې له درونو وسلو استفاده شوې ده.
پاکستان افغانستان سره د چمن دروازه بېرته پرانيستله
د اسوشتيد پریس د رپوټ پر اساس، په افغانستان کې د کندهار د والي وياند، عطاالله ضیا، وويل داسې ښکاري چې د پاکستاني او طالب ځواکونو تر منځ نښتې د پولې افغان لور ته د تلاشۍ د یوې نوې پوستې د جوړېدو په تړاو شوي وي.
ویاند زیاته کړې چې په دغو ډزو کې یو طالب جنګیالی وژل شوی او ۱۰ نور ټپیان دي. هغه دغه راز وويل چې ۳ تنه ملکيان هم ټپیان شوي دي.
د پاکستان پوځ هم منلې چې د دوی ځواکونو پر طالبانو ځوابي ډزي کړي، خو نور جزئيات ېې نه دي ورکړي. د پوځ په اعلاميه کې ويل شوي دي چې پاکستاني چارواکي د دغې سرحدي پېښې د شدت ښودلو په موخه د افغانستان پلازمينه کابل ته رسيدلي دي.
په چمن کې د حکومتي روغتون یوه ډاکټر اختر محمد، تر دې دمخه اسوشتید پریس ته ويلي وو چې ۲۷ ټپيان دغه روغتون ته وروړل شوي چې د ۷ تنو روغتیايي وضعیت کړکیچن دی.
د پاکستان لور ته اوسیدونکي یوه ځایي کس ولي محمد ویلي دي چې د فیرونو په ادامه یو شمیر چاودنې هم وشوې: «موږ د نورو ورځو په څير پر لاره وو چې ناڅاپه د يوې لوېې چاودنې غږ شو چې پکې زما د یو وراروه په ګډون ډير کسان په ماتو خښتو او ګاڼو ولګيدل.»
د چمن بولدک پولې نښته چا او څنګه شروع کړه؟
د پاکستان صدراعظم شهباز شریف پر طالبانو نېوکه کړې. هغه د دوشنبې په ورځ پر ټويټر لیکلي دي: «د افغانستان سرپرست حکومت باید ضمانت وکړې چې دغه ډول بریدونه نباید تکرار شي.»
دا په داسې حال کې ده چې د نومبر په وروستيو کې په کابل کې د پاکستان سفارت تر ډزو لاندې راغی چې پاکستاني چارواکو هغه پر خپل سفير حمله وګڼله او طالبان ېې د امنیت په نیولو کې پړه وګڼل.
چمن کندهار سرحد؛ په ډزو کي پاکستانی عسکر وژل شوی
په دغو ډزو کې د سفارت يو ساتونکي ټپي شو. طالبانو یوه اوونۍ مخکې اعلان وکړ چې دوی هغه کس چې د پاکستان پر سفارت ېې ډزې کړې نيولی دی. د طالبانو ویاند ذبیح الله مجاهد هغه وخت د ټویټر په یوه پیغام کې ویلې دي، چې دغه بریدکوونکی «د یو بهرني هیواد تبعه او د داعش ډلې غړی دی.»
(AP)mks/nz/
له آرشیف څخه یو انځوریز البوم: