د سوريې او اسرائيل تر منځ تازه کشمکشونه
۱۳۹۹ مرداد ۴, شنبه
د سوريې د حکومتي تلويزيون د رپوټ په حواله، د اسرائيل پوځي هيلي کوپټرو د جمعې په ماښام (د جولای ۲۴مه) د جولان غونډۍ قنیطره سيمې ته څيرمه، حمله وکړه چې دوه سوريايي سرتيري يې ټپيان کړل. اسرائيل هم د دغو کشمکشونو پيښيدل تائيد کړي، خو د ځای او و خت په اړه يې څه نه دي ويلي.
د اسرائيل پوځ په يوه ټويټري پيغام کې ويلي دي چې ډزې په لومړي سر کې سوريې پيل کړې چې د اسرائيل پوځ يې پر وړاندې غبرګون وښود.
د اسرائيل پوځ له خوا په دغه پيغام کې راغلي: «موږ د سوريې رژيم مسئول ګڼو او د اسرائيل قلمرو پر وړاندې هر ډول تحرک ته ځواب ورکوو.»
د اسرائيل پوځ د پنجشنبې په ورځ (د جولای ۲۳مه) د اسرائيل په شمال کې د خپلو ميشتو ځواکونو د لا تقويې له پاره نور ځواکونه واستول. د اسرائيلي رسنيو په حواله، دغه اقدام د لبنان د حزب الله ډلې پورې اړوند، د منار تلويزيون د يو رپوټ په غبرګون کې ترسره کيږي. په رپوټ کې راغلي وو چې پر سوريه د اسرائيلو په توغنديز بريد کې د حزب الله ډلې يو لوړپوړی غړی وژل شوی دی.
ويل کيږي چې دغه کس علي کمال محسن نوميده چې حزب الله يې د غچ اخیستو ګواښ کړی وو.
داسې هم ويل کيږي چې علي کمال د دمشق په سويل کې د اسرائيل د دوشنبې شپې په هوايي حمله کې وژل شوی وو.
د لبنان حزب الله ډله د لبنان په سويل کې فعال حضور لري.
دويچه ويله ف/م.ن.ص./م.ک.ص