فرانسه هم د افغانستان سره د يوه ستراتيژيک تړون لاسليکول غواړي
۱۳۹۰ آبان ۸, یکشنبهد افغانستان د بهرنيو چارو وزارت وياند جانان موسي زي د يکشنبې په ورځ په کابل کي يوې خبري غونډي ته وويل، چي فرانسې د اوږدې مودې د همکاریو په موخه د ستراتيژيک تړون د لاسليکولو له پاره افغان چارواکو ته خپل وړانديز کړی. او په پام کي ده، چي د بن د دوهم نړيوال کنفرانس تر مخه به لاسليک سي.
د هغه په خبره ددغه سند د لاسليکولو څخه د افغان حکومت هغه هلي څلي دي چي غواړي د نړيوالي ټولني سره ښې او پراخي اړیکي ولري.
« هيله مند يو چي دغه سند به د افغانستان هغه لاسته راوړنو ته نوره هم گټه ورسوي، چي په امنيتي، سياسي او اقتصادي برخه کي يې لري.»
د بهرنيو چارو وزارت وياند وويل، چي فرانسې په تيرو لسو کلونو کي په افغانستان کي د امنيت د ټينگښت له پاره ډيري قربانۍ ورکړي او اوس هم ددغه هيواد ځواکونه په کاپيسا ولايت او سروبي ولسوالۍ کي مېشت دي.
هغه دغه راز زياته کړه، چي فرانسې د افغانستان سره د مرستو په لړ کي تر اوسه پوري شاوخوا ۵۰۰ ميليونه ډالره مرسته کړې.
په دې خبري غونډه کي د افغانستان د کورنيوچارو وزارت وياند دغه راز وويل، چي ټاکل سوې جمهوررئيس حامد کرزی به د استانبول د کنفرانس يوه ورځ دمخه په ترکيه کي د پاکستان او ترکيې له چارواکو سره په يوه درې اړخيزه غونډه کي گډون وکړي.
د هغه په خبره د استانبول کنفرانس، چي د « په افغانستان کي د امنيت د ټينگښت او سيمه ييزي همکاریو» په نامه ياد سوی د نومبر د مياشتي پر ۲ نېټه به پيل سي.
نوموړي وويل، په روان وخت کي افغانستان په سيمه کي د ډيرو هيوادونو سره ژوري اړيکي لري او د استانبول د کنفرانس ځانگړتيا په دې کي ده، چي په سيمه کي د ټولو هيوادونو گټي او تاوانونه سره شريک دي او بايد د صادقانه همکارۍ له پاره هوډ وکړي.
حسين سيرت/ کابل
کتونکی: نجيب الله زيارمل