له پاکستانه اخراج شوي کډوال وايي چې خالي لاس وطن ته ستنیږي

اوس چې هره ورځ ډېري کورنۍ بیرته افغانستان ته ستنیږي، د دوی په ډله کې داسې کورنۍ شته چې ځینې يې د اقتصادي، امنیتي او تحصیلي ستونزو له امله، پاکستان ته ګدوالې شوې وې خو اوس پر دغو ستونزو سربیره د پاکستان حکومت له لورې اړي شوي چې له دغه هیواده ووځي.

له دغه کورنیو یوه یې د عبدالولي خان کورنۍ ده، چې شل کال پخوا پاکستان ته ګډواله شوې وه او د دغه هېواد ، ګجره واله – وزیر اباد کې د ژوند کولو تر څنګ د کباړ کاروبار کاوه، چې د کورنۍ ټول مالي ضرورتونه یې له همدې کارو بار پوره کول.

عبدالولي خان چې اصلاً د قندوز ولایت اوسېدونکی دی، دم کړۍ د خپلې ۲۵ کسیزه کورنۍ سره د ژوند د ګڼو مشکلاتو ترڅنګ د طورخم په ښارګوتي کې؛ د نا معلومه برخه لیک له امله د شنه اسمان لاندې سختې شپي او ورځي سبا کوي.

عبدالولي خان، دویچه ویله ته وویل: «د پاکستاني پولیسو له بد چلند سره مخ وم او په ډیرې بې رحمۍ یې مجبور کړم تر څو کډه بار کړم، حتی د کور ځینې اړین سامانونه او پر خلکو قرض پیسې راڅخه پاتې شوې.»

نقیب الله چې دعبدالولي خان ۱۴ کلن زوی دی، وايي چې په زده کړه بوخت وو، خو په دې نه دی توانیدلی چې خپل د زده کړو کتابونه له ځان سره خپل هیواد ته انتقال کړي.

بل اړخ ته په ټولنیز پاڼو داسې انځوورنه خپاره شوي چې تورخم دروازې ته څیرمه د فعالو ځوانانو د یوې ډلې له لوري له پاکستان نه د راستنېدونکو ګډوالو تود هرکلی پکې شوی او د ګلانو په ورکړه يې بدرګه کړي، خو دا لا روښانه نه ده چې راتلوونکي ګډوال به په خپل هېواد کې له څومره مشکلاتو سره مخ وي.

په داسې حال کې چې له پاکستان په زور او جبر د ګډوالو د ایستلو پرېکړه د بېلابېلو نړیوالو سازمانونو او یو شمېر هېوادونو له نیوکو سره مخ شوې ده، خو پاکستان د دغې پرېکړې پر عملي کېدو ټینکار کړی او ویلي يې دي چې نرمښت پکې نه شي راوستلی.

د دې ترڅنګ د پاکستان دغه پرېکړه په دغه هېواد کې د ځینو سیاسي تنظیمونو، سیاسي فعالانو، ولسي ملاتړ لرونکو او فرهنګي شخصیتونو له لورې هم غندل شوې.

په افغانستان کې د طالبانو سرپرست حکومت هم د یوې اعلامیې په خپرولو سره له ګاونډیو هېوادونو وغوښتل چې د اسلامي ورولۍ اصل ته په پام کې له افغان کډوالو سره مناسب چلند وکړي.

د یادونې ده چې دم کړۍ په پاکستان کې په لګونه افغانان اوسي او د ملګرو ملتونو د اټګل له مخې یوازې تر شپږه لکه ډېر افغانان د طالبانو تر دوهم ځلې واکمنۍ وروسته پاکستان ته تللي دي او یوه لویه برخه يې هغه کسان دي چې په پرمختللیو هېوادونو کې د پناه اخېستلو لپاره شیبې شماري.

ب.س / خ.ح / ن.ز