نابينا افغان ورزشکار په لندن کې د سرو زرو دوه مډالونه وګټل
۱۴۰۲ تیر ۷, چهارشنبه
د ځغاستي سیالۍ چې د مختلفو هیوادونو ۷۰ نابینا او نیمه نابینا ورزشکارانو پکې برخه اخیستې وه، د لندن په کوربتوب ترسره شوې. په لندن کې مېشت افغان نابینا ورزشکار ولي محمد نوري په دې وتوانېد چې د دغو سياليو په دوو پړاوونو کې خپلو سیالانو ته ماتې ورکړي او د سرو زرو دوه مډالونه وګټي.
زموږ د فيسبوک پاڼه هم درسره تعقيب کړئ
دغه نابينا افغان لوبغاړي پر خپله فیسبوک پاڼه په یوه پیغام کې ویلي، چې دا د ۴۰۰ او ۵۰۰ مترو واټن د سيالۍ وې. نوموړی زیاتوي، چې دا سیالي د ده لپاره ستونزمنه وه، خو په ډېرې هڅې او تمرین سره وتوانېده، چې لومړی مقام خپل کړي.
اړوند مطلب: پر طالبانو بندیزونه پر افغان ورزشکارانو څه اغېزې لري؟
ولي محمد نوري چې په لندن کې اوسېږي، تر دې مخکې یې د ځغاستي او لامبو په سیالیو کې ډېرې لاسته راوړنې لرلي دي. تر اوسه يې د ځغاستې په پنځلسو او د لامبو وهلو په دريو سياليو کې ګډون کړی چې د سرو زرو مډالونه او د اتلولۍ جامونه يې ګټلي دي.