د ایران په زندانونو کې څومره افغانان بندیان دي؟
۱۴۰۱ اسفند ۵, جمعه
له ایران څخه افغانستان ته د افغان زندانیانو د لېږدونې بحث شاوخوا درې کاله وړاندې کله چې هلته د کرونا ویروس په اوج کې و مطرح شوی دی.
د ۲۰۲۰م کال په مارچ میاشت کې د ایران حکومت چمتووالی ښودلی وو چې شاوخوا ۲۰۰۰ افغان زندانیان به خپل هيواد ته ولېږدوي.
د شمېرو له مخې، دا مهال شاوخوا ۵۰۰۰ افغانان د ایران په زندانانو کې بندیان دي.
اړوند مطالب:د افغان کډوالو پر ستونزو په تهران کې څلور اړخیزه غونډه
په تهران کې د افغان کډوالو د حقونو یوې فعالې آصفه ستانکزۍ دویچه ویله ته وویل: «هغوی تر ډېره د قاچاق او نشه يي توکو اړوندو مسایلو په تور نېول شوي، خو په دې کې نور موضوعات هم شته.»
اوس د طالبانو حکومت هڅه پيل کړې ده چې د دغو زندانیانو وضعیت له نیږدې وګوري او هېواد ته د رالېږدولو هڅه یې کوي.
د طالبانو حکومت د رسنیو مرکز مشر انعام الله سمنګاني په خپله ټویټرپاڼه لیکلي: «د هېواد د لوی څارنوال مولوي شمس الدین شریعتي په مشری یو پلاوی په ایران کې د افغان زندانیانو د وضعیت ارزونې په موخه تهران ته ولاړ.»
ایران میشتې افغان فعالې آصفه ستانکزۍ وویل ایران ته د طالبانو حکومت د پلاوي سفر به ډېر اغیز ونه لري، خو لږ تر لږه د افغان زندانیانو د وضعیت ارزونې له پاره یوه ډیالوګ ته لاره هوارولی شي.
اوسمهال شاوخوا ۵ میلیونه افغانان په ایران کې د کډوالۍ ژوند کوي، چې ډېر یې هلته د قانوني اوسېدو اسناد هم نه لري.