د بودجې کمښت او د ځینو پراختیايي پروژو د کارونو ځنډېدل
۱۴۰۰ مرداد ۲۱, پنجشنبه
د رپوټونو له مخې، افغان حکومت له اختیاري بودجې شاوخوا ۴۹ میلیارده افغانۍ کمې کړي، چې له امله یې د هېواد په ډېر شمېر ولایتونو کې د پراختیايي پروژو چارې هم په ټپه درېدلي. ویل کیږي د یوشمېر پروژو چارې امنیتي او دفاعي سکټور ته د پېسو لېږديدو له امله هم ځنډیدلي.
د غزني د ولایتي شورا یوه غړي عصمت الله جمرودوال دویچه ویله ته وویل، چې ماليي وزارت د ولسمشر په امر د هغو پروژو پیسې دفاعي سکټور ته لېږدولي چې کارونه یې تر ۵۰ سلنه لږ بشپړ شوي. هغه وويل: «په دې اړه رسمي مکتوب ورکړل شوی او له همدې امله د ډېرو پروژو کار په ټپه درېدلی.»
ښاغلی جمرودوال چې د غزني د ولایتي شورا غړی دی، زیاتوي چې د پروژو د کارونو ځنډېدو له امله د بې وزلی او وزګارتیا کچه نوره هم لوړیږي.
د غزني ډېر شمېر ولسوالۍ د طالبانو په ولکه کې دي او اوس طالبانو د غزني د مرکز سقوط کولو ادعا هم کړې.
جمرودوال وویل، د وزګارتیا له امله ځوانان د طالبانو او نورو جنګیالیو لېکو ته جذبیږي چې دا هم د هېواد د بې ثباتۍ او د حکومت له واکه د ډېرې جغرافيي د لاسه ورکولو لامل کیدای شي.
ده وویل، د غزني د امنیه قوماندانۍ د جوړولو پروژه چې ټاکل شوې نیږدې ۲۰ جریبه ځمکه کې جوړه شي، د طالبانو د پرمختګ له امله یې چارې په ټپه درېدلي.
ځنډول شوې پروژې
سره له دې چې چارواکي وایي، په ولایتونو کې لاهم د پروژو د تطبیق چارې پرمخ روانې دي، خو ځايي تلویزوني چاینل طلوع نېوز ته سرچینو منلې چې د اوبو د بندونو د لسهاوو پروژو چارې ځنډېدلي.
د افغانستان په زیربنايي پروژو کې د روڼتیا په اړه تازه راپور
په رپوټ کې راغلي چې د کابل د للندر بند جوړولو لپاره ۱۷۰ میلیونه افغانۍ په پام کې نېول شوې، خو اوس یې د بودجې د کموالي له امله کارونه په ټپه درېدلي.
چارواکي د طالبانو د چټک پرمختګ او د جګړو د پراختیا له امله د مشخصو پراختیايي پروژو پر درېدو څه نه وايي، خو زیاتوي چې د جګړې سره سره یې د پروژو کارونه هم روان دي.
د افغانستان د ټولګټو وزارت وايي، چې په ۱۴۰۰ مالي کال کې یې د څه باندې ۴.۴ میلیارده افغانیو په ارزښت د دولسو پروژو تړونونه لاسلیک کړي.
دغه راز د ۱۸ میلیارده افغانیو په ارزښت د ۶۸ نورو پروژو پر تدارکاتي پړاوونو کار روان دی.
د ټولګټو وزارت تخنیکي مرستیال، عبدالقیوم ځاځي، نن پنجشنبې (د ۲۰۲۱ میلادي کال د اګست ۱۲مه) په کابل کې خبریالانو ته وویل: «د ۶۸۴ کیلومتره سړکونو له جملې چې د وزارت له اختیاري بودجې څخه تمویلېږي، په کندهار، روزګان، تخار او لغمان ولایتونو کې د ۱۴۰ کیلومتره سړکونو د جوړولو چارې بشپړې شوي دي.»
دغه راز د ټولګټو وزارت تخنیکي مرستیال وویل د هېواد په بېلابېلو سیمو کې د ټولګټو وزارت د غیر اختیاري پروژو چارې هم دوام لري.
په دې پروژو کې د اسیا پراختیایي بانک، نړیوال بانک، اسلامي پراختیایي بانک، د سعودي پراختیايي صندوق او د ایټالیې دولت پروژې شاملې دي.
زموږ له آرشيف څخه: