په افغانستان کې د پوليو ضد واکسين کمپاين پېل شوی
۱۴۰۳ آبان ۷, دوشنبه
د طالبانو د روغتيا وزارت وياند ډاکتر شرافت زمان، د يوې اعلامیې په خپرولو سره ويلي دي چې دا درې ورځنی کمپاين به چې په روان ميلادي کال کې دريم دا ډول کمپاين دی، د هېواد له ۳۴ څخه په ۱۶ ولایتونو کې ترسره شي.
چارواکو په دې ترڅ کې پر مذهبي او قومي مشرانو، والدينو او د ټولنې پر نورو بانفوذه شخصيتونو باندې د دې کمپاين د ملاتړ او له پوليو څخه د ماشومانو د ساتنې غږ کړی دی.
پوليو يا ګوزڼ چې یوه ساري مکروبي ناروغي ده، د فلج کيدو او مړينې باعث هم ګرځېدلی شي.
طالبانو د روان کال په سبتمبر میاشت کې د پوليو يو مخکنی کور په کور کمپاين ځنډولی وو چې هدف یې د واکسين د تطبیق په تګلاره کې بدلون بلل شوی وو. ملګرو ملتونو هغه مهال ويلي ول چې طالبانو د کور په کور واکسين پر ځای په جوماتونو کې د واکسين د تطبيقولو سپارښتنه کړې ده.
په دسمبر مياشت کې د روغتيا نړيوال سازمان (دبليو اچ او) خبرداری ورکړی وو چې له پاکستان څخه د افغان مهاجرو هېواد ته له بيرته ستنېدو سره د پوليو د خپريدو خطر ډېر شوی دی. له هغه وخت راهېسې افغانستان د واکسيناسيون څو دورې عملي کړي دي.
د روغتيا نړيوال سازمان په افغانستان کې په روان میلادي کال کې د پولیو ۲۳ قضيې ثبت کړي دي. دا په داسې حال کې ده چې د طالبانو د روغتيا وزارت بيا ادعا کوي چې په روان ميلادي کال کې هیڅ مثبته پېښه نشته. په تېر ميلادي کال کې په دغه هېواد کې په ټولیزه توګه د پوليو يا ګوزڼ ۶ قضیې ثبت شوې وې.
په افغانستان او پاکستان کې د واکسيناسيون کمپاينونه د توطيو د نظريو له کبله لکه دا چې واکسين د شنډ کيدو باعث کيږي او دا چې د واکسيناسيون په ترڅ کې جاسوسي ترسره کیږي، تل له ننګونو سره مخامخ وي.
په ۲۰۲۱م کال کې واک ته د طالبانو تر رسېدو مخکې، دغه ډلې تر خپل کنترول لاندې سيمو کې کور په کور واکسيناسيون منع کړی وو. خو په ۲۰۲۱م کال کې د دغه ډلې تر واکمنېدو وروسته ورسره ملګرو ملتونو په ټول هېواد کې د واکسيناسيون د پروګرام د بيرته پېلولو په اړه بريالۍ خبرې اترې وکړې.
ب. ص/ ن. ز (dpa)