«چین د تایوان تر ولکې لاندې راوستلو له پاره بهانې لټوي»
۱۴۰۱ مرداد ۱۸, سهشنبه
د تایوان د بهرنیو چارو وزیر جوزف ؤو، د سه شنبې په ورځ (۲۰۲۲م کال د اګست میاشتې ۹) یوه خبري کنفرانس ته په وینا کې وویل چې د چین د پوځي تمرینونو هدف په اصل کې د تایوان تر خپلې ولکې لاندې راوستلو له پاره تیاری نیول دي.
هغه تور ولګاوه چې تایوان ته د امریکا د کانګرس د مشرې دورې په بهانه کولو سره چین پوځي مانورې پيل کړي دي چې دا په اصل کې د تایوان تر خپل کنترول لاندې راوستلو یا نیولو یو پلان دی.
جوزف ؤو، د تایوان پلازمېنه تائپي کې له خبریالانو سره د خبرو پر مهال وویل چې د خپلو دفاعي صلاحیتونو د آزمایلو په خاطر د تایوان پوځ هم د تایوان په آبنا یا تنګه کې لایف یا ژوندي پوځي تمرینونه پيل کړي دي.
د ؤو په وینا، د بیجینګ حکومت هڅه کوي چې اوسنی حالت پای ته ورسوي او تایوان له چین سره ضمیمه یا یوځای کړي. خو هغه دا ونه ویل چې چین کله پر تایوان د حملې کولو پلان لري.
د بیجینګ حکومت د یوه چین تګلارې له مخکې پر دې ۲۳ میلیونه نفوس لرونکي شخړیز ټاپو د خپل حق تامينولو کوښښ کوي، په داسې حال کې چې تایوان بیا ځان یو خپلواک هیواد بولي.
په نړیواله کچه یوازې شاوخوا لسو هیوادونو تایوان د یوه خپلواک هیواد په توګه په رسمیت پيژندلی دی چې امریکا په کې شامله نه ده.
چین په وار وار خبرداری ورکړی دی چې که اړتیا پیښ شي، نو تایوان به له زور څخه په کار اخیستنې سره د چین یوه برخه وګرځوي. خو د تایوان د بهرنیو چارو وزیر واضحه کړې ده چې بیجینګ د تائپي پر ځمکنۍ بشپړتیا او حاکمیت برید نه شي کولی.
د چین دریځ څه دی؟
چین وایي چې امریکا هم د «یوه چین تګلاره» په رسمیت پيژني، له همدې امله له تایوان سره د هیڅ ډول دیپلوماتیکو اړیکو ټینګولو ته اړتیا نه لري. له همدې امله بیجینګ د امریکا د دغې لوړپوړې چارواکي له خوا د دې شخړیز ټاپو پر دورې شدید احتجاج ثبت کړی دی، په داسې حال کې چې پر نانسي پلوسي یي بندیزونه هم لګولي دي.
د دوشنبې په ورځ چین ویلي و چې د تایوان شاوخوا د پوځي تمریونو موده یې غځولې ده. چین ادعا کوي چې دا عادي یا د معمول مطابق پوځي مانورې دي په کوم کې چې يې پوځ په خپلو سرحدي حدودو کې دننه دی.
د چین د بهرنیو چارو وزارت دغه نظامي مانورې د امریکا او تایوان له پاره د «اړین خبرداري» په بللو سره ویلي دي چې دا له تایوان څخه د امریکا متحده ایالاتو د کانګرس د مشرې د دورې «مناسب غبرګون» دی. چین د ناسي پلوسي دغه دوره پاروونکې بللې ده.
آژانسونه: ش.ن/ ن.ز