آلمان د هغو افغان مهاجرو د مالي مرستو ارزونه کوي چې اخراجیږي

د آلمان د کورنیو چارو وزيره نانسي فيزر، غواړي افغانستان ته د مجرمو او خطر جوړونکو مهاجرو د اخراج پر وړاندې موجوده خنډونه لري کړي. هغه اوس له دا ډول مهاجرو سره د مالي مرستو پر يو پروګرام فکر کوي.

د آلمان د کورنیو چارو وزارت ويلي دي چې دغه وزارت د ارزونې په حال کې دی چې افغانستان ته د اخراجونو د عملي کولو شرایط څنګه مهیا کېدلی شي.

دغه وزارت زیاته کړې ده چې په دې برخه کې د «سفر مالي ملاتړ» هم کېدای شي امکان ولري.

د دغې مسئلې په هکله لومړی آلمانۍ ورځپاڼې «بېلد» رپوټ ورکړی دی.

د آلمان د کورنیو چارو وزارت په خبره، دا چې آیا دا ډول مالي ملاتړ به په نهایت کې تاديه شي او په څه مقدار کې به وي، تصمیم ېې هغه ایالتونه نیسي چې د اخراج مسئول وي.

د مجرمينو پر اخراج د آلمان د صدراعظم ټينګار

د آلمان صدراعظم اولاف شولڅ، د روان کال په جون میاشت کې د منهایم د چاقو تر وژونکې حملې وروسته اعلان وکړ، هغه افغان او سوریايي مهاجر چې د درنو جرمونو مرتکب شوي او یا ورڅخه تروریستي ګواښونه موجود وي، باید اخراج شي.

خو د دا ډول اخراجونو پر وړاندې یو لړ حقوقي خنډونه موجود وي. په همدې اساس د دې امکان شته چې په نظر کې د نيول شوو انفرادي اخراجونو کیسونه د آلمان په محکمو کې له ماتې سره مخ شي. د بېلګې په توګه که یو افغان مهاجر په محکمه کې استدلال وکړي چې افغانستان ته د اخراجېدو په صورت کې د فقر له خطر سره مخ کيږي.

په حاضر وخت کې هم د رد شوو مهاجرو د اخراج له پاره د مالي ملاتړ پروګرامونه شته. د آلمان حکومت د دغو پروګرامونو په چوکاټ کې هغو مهاجرو ته چې په داوطلبانه توګه خپل هېواد ته بېرته ستنيږي، د پرواز مصرف او په خپل هېواد کې د نوي ژوند د پیلولو له پاره مالي مرسته کوي.

د دغو مرستو مقدار د مبدا هېواد او د مهاجر له مدنی حالت سره تړاو لري.

  mks/nz/nk/af (dpa)

له آرشیف څخه: