جرمني: د ایراني پناه غوښتونکو د اخراج ځنډول باید وغځول سي
۱۴۰۲ مرداد ۷, شنبه
د نورډ راین ویسټ فالین ایالت حکومت په یوه لیک کې د کورنیو چارو له فدرالي وزارت څخه غوښتي چې په ایران کې د بشري حقونو د پرله پسې سرغړونو له امله د ایراني کډوالود اخراج د ځنډولو موده تمدید کړي.
په هغه راپور کې چې د المان په رسنیو کې خپور سوی، په دې شرایطو کې د ایرانیانو بیرته ستنیدل «غیر مسئولانه» بلل سوي دي.
د جرمني ایالتونه کولای سي په خپلواکه توګه د شپږو میاشتو لپاره د اخراج مخه ونیسي. د نورډ راین ویسټ فالین ایالت لا دمخه دا حق کارولی دی. په دې برخه کې د دولت وروستۍ باوري هوکړه د روان کال د جون میاشت په پای کې پای ته ورسېده.
په همدې میاشت کې اعلان وسو چې د آلمان د کورنیو چارو وزارت د رد سویو پناه غوښتونکو د نه راستنیدو په اړه د مرکزي حکومت او ایالتونو ترمنځ د موافقې د غځیدو هرکلی وکړ.
د جرمني رسنیو لیکلي چې د کورنیو چارو وزارت د ارزونې له مخې د ایران د منتقدینو او لاریون کوونکو له حقونو څخه جدي سرغړونې د پخوا په څېر دوام لري او په داسې شرایطو کې د پناه غوښتونکو ایستل به غیر مسئولانه وي.
په دې اړه دفدرالي حکومت د کورنیو چارو وزارت، ایالتي حکومتونو ته په یوه لیک کې له هغوی غوښتي چې د ایراني پناه غوښتونکو د اخراج د ځنډولو په اړه دې هوکړې ته دوام ورکړي او په دې برخه کې دې ورته کړنلاره غوره کړي.
د نورډ راین ویسټ فالین ایالت د کډوالو چارو وزارت وايي، تر دې دمه په ټولو ایالتونو کې د ایرانیانو د اخراج د مودې غځولو لپاره غوښتنه نه ده سوې.
دغه وزارت ویلي دي چې له دې ټولو سره سره په ایران کې د بشري حقونو وضعیت ته په پام سره د ایرانیانو شړل به د دوی ژوند د خطر سره مخامخ کړي.
د جمعې په ورځ د (جولای ۲۸مه) په یوه بل لیک کې د کډوالو چارو وزارت د کډوالۍ سیمه ییزو چارواکو ته خبرداری ورکړ چې لا هم د ایرانیانو بېرته ستنېدل د توجیه وړ نه ګڼي. په همدې خاطر له مسئولو چارواکو غوښتل سوي چې دوسیې په هر اړخیزه توګه وڅیړل سي.
دا وزارت دلته د اپریل په میاشت کې د ایرانیانو د اخراج د بندولو په اړه یو حکم ته اشاره کوي. په دې حکم کې ټینګار سوی دي چې دا تعلیق په خطرناکو خلکو، جدي مجرمینو او نورو هغو «خلکو چې شړل یې د جدي ګټو سره تړاو لري» نه پلي کیږي.
نورډ راین ویسټ فالین ایالت د آلمان د ۸۵ میلیون نفوس نږدې څلورمه برخه لري او د ایالتونو او فدرالي حکومت په ګډو پریکړو کې د ډیر وزن لرونکي ګڼل کیږي.
د نورډ راین ویسټ فالین ایالت د کډوالو چارو وزیر، یوزفین پاول، چې د زرغون ګوند څخه دی، د المان خبري آژانس ته ویلي دي چې د دغه ایالت حکومت د هغو ایرانیانو سره پیوستون ته دوام ورکوي چې په ویره کې د خپلې ازادۍ لپاره مبارزه کوي.
پاول وايي: «د نیولو، شکنجې او ډله ایزو اعدامونو ورځني خبرونه ښیي چې موږ په ایران کې له کوم ظالم رژیم سره مخ یو.»
هغه زیاتوي، نارینه، ښځې او حتی ماشومان چې د خپلو حقونو د ترلاسه کولو لپاره سوله ییز لاریون کوي د رژیم له لوري له ورته چلند سره مخ دي.
په المان کې د هغو پناه غوښتونکو د اخراج د بندیدو غوښتنې نه دي منل سوي، چې دښځو، ژوند، ازادۍپه نوم د ناکراریو له پیل راهیسې د سیاسي ګوندونو، سیمه ییزو حکومتونو او مرکزي حکومت تر منځ د تیر کال په سپټمبر کې د بحث موضوع ده. د نورډ راین ویسټ فالین د ایالت د پناه غوښتنې وزیر یو نوی لیک نور ایالتونه هڅوي چې دا ډول بندیزونه وغځوي.
ص.ز/ن.ص