ایران: وسله والو کسانو درې سرحدي ساتونکي وژلي
۱۴۰۳ شهریور ۲۳, جمعه
د ایران دولتي رسنۍ رپوټ ورکړی چې دغه پېښه د پنجشنبې په ورځ د پاکستان سرحد ته نژدې شوې ده.
د ایرنا خبري آژانس په حواله، پېښه د ایران د سیستان ایالت او د پاکستان بلوچستان ایالت ته نژدې په میرجاوه علاقه کې رامنځ ته شوې ده. زیاته شوې چې په موټر کې سپرو وسله وال د سرحدي ساتونکو پر یوه موټر ډزې کړي دي چې په نتیجه کې يې یو افسر او دوه سرتيري وژل شوي دي.
په دغه پېښه کې یو ملکي کس ټپي شوی دی.
ایرنا زیاتوي چې د حملې مسئولیت د جهش العدل وسله والې ډلې منلی دی چې ويل کيږي د بلوچ لږکۍ د لا ډېرو حقونو د تامين په لټه کې دي.
د ایران سیستان له پاکستان او افغانستان سره ګډه پوله لري. په دغه ایالت کې د وسله والو یاغیانو، د مخدره موادو قاچاقچیانو او د ایران امنيتي ځواکونو تر منځ خونړۍ نښتې کيږي.
په اپریل میاشت کې دغه سیمه کې د دوو جلا حملو په ترڅ کې لږ تر لږه ۲۲ پولیس ووژل شول او په دسمبر کې د پولیسو پر یوه پوسته د وسله والو په حمله کې شا او خوا لس پولیس ووژل شول.
(AP)mks/nz