تر کریسمس وروسته د جګړې ختمولو له پاره د زیلنسکي وړاندیز
۱۴۰۱ آذر ۲۲, سهشنبه
د اوکراین ولسمشر ولودیمیر زیلنسکي په غیر مستقیم ډول اشاره کړې ده چې که روسیه تر کریسمس وروسته خپل پوځي واحدونه له اوکراین څخه وباسي، دا به د روسیې او اوکراین ترمنځ د جګړې پای ته رسیدو سبب شي.
د اوکراین ولسمشر د دوشنبې په ورځ (۲۰۲۲م کال د دسمبر ۱۲)، د یوه ویډیویي کنفرانس له لارې په برلین کې د جي ۷ سرمشریزې ته اشاره وکړه چې روسیه له دې اقدام سره کولی شي خپل واقعي نیت مشخص کړي.
ولودیمیر زیلنسکي په دې غونډه کې زیاته کړه: «که روسیه له اوکراین څخه خپل پوځ وباسي دا کار به هرومرو د جنګي فعالیتونو د دریدو سبب شي. زه داسې کوم دلیل نه وينم چې روسیه دې دا کار د کریسمس په درشل کې ترسره نه کړي.»
زيلنسکي له جي ۷ هېوادونو څخه د نور طبعی گاز غوښتنه کړې
په ورته وخت کې زیلنسکي په دې باور دی چې روسیه په اوس وخت کې اراده لري چې د برېښنا د تامينولو پر مرکزونو خپل بریدونه زیات کړي.
د اوکراین ولسمشر د دوشنبې تر غرمې وروسته په خپله ورځنۍ ویډیویې وینا کې واضح کړه: «موږ د روسیې له خوا تر هر برید وروسته د امکان تر حده خپل سیستم بیرته رغوو. هر څه د ترسره کیدو په حال کې دي، څو د ویجاړیو د بیرته رغونې له پاره نوي تجهیزات هیواد ته وارد کړای شي.»
نوموړي زیاته کړه: «خو سره له دې باید په پام کې ونیول شي چې روسیې د ترور له تکتیکونو څخه لاس نه دی اخیستی.»
اوکراین ژر د ځوابي عملیاتو د پيلولو اعلان کړی
زیلنسکي د روسیې له خوا د پراخو توغندیزو بریدونو د نه ترسره کیدو په برخه کې پيش بیني کوي چې د دې علت «نوو بریدونو ته د دښمن تیاریدل دي.»
د اوکراین ولسمشر همدارنګه د خپل هیواد له خلکو وغوښتل چې «د هوایي بریدونو خبردار دې جدي وګڼي، څو د هر ډول احتمالي پيښې له پاره تیار اوسي».
آژانسونه: ش.ن/ ن.ز