طالبانو له المان څخه اخراج شوي مجرمان خوشې کړي دي

د یوه لوړپوړي طالب چارواکي په حواله له المان څخه افغانستان ته اخراج شوي مجرمین ازاد شوي دي. په قطر کې د طالبانو د سیاسي دفتر ویاند سهیل شاهین د المان خبري آژانس ته ویلي دي چې په لومړي سر کې دغه کسان ارزول شوي دي: «دغه کسان وروسته له هغې خوشې شول، چې کورنیو یې په لیکلې بڼه ضمانت وکړ چې دوی به بیا جرمي عمل نه ترسره کوي».

په کابل کې د طالبانو د ادارې د بهرنیو چارو وزارت تر اوسه پورې په دې هکله د المان حکومت پوښتنه یا استلام نه دی ځواب کړی.

وروسته له دې چې طالبانو دری کاله مخکې په افغانستان کې یو وار بیا واک په خپل لاس کې نیولی دی د تیرې جمعې (د ۲۰۲۴م کال د اګست ۳۰مه) په ورځ د لومړي ځل له پاره له المان څخه افغانستان ته د اخراج شوو افغان مهاجرو یو پرواز ترسره شو.

د قطر هوایي شرکت (Qatar Airways) په الوتکه کې ۲۸ هغه افغان مهاجر افغانستان ته اخراج شول چې په المان کې مجرم پیژندل شوي وو او په دغه هیواد کې یې د پاتې کیدو حق نه درلود او باید اخراج شوي وای.

د المان په پارلمان کې د حکومتي اتحاد فرکسیون د اخراج د پروازونو د لازیاتولو غوښتنه کړې ده. د الجزیره خبري رسنۍ د رپوټ پر بنسټ د المان حکومت او طالبانو ادارې ترمنځ دغه توافق د خلیجي هیواد قطر په منځګړیتوب صورت نیولی دی.

المان په کابل کې د طالبانو له ادارې سره هیڅ ډول دیپلوماتیکې اړیکې نه لري. تر اوسه پورې د نړۍ هیڅ هیواد د طالبانو حکومت په رسمیت نه دی پيژندلی.

دغه ډله په ځانګړي توګه د بشري حقونو د نقضولو او په ځانګړي توګه د ښځو د حقونو تر پښو لاندې کولو له امله په نړیواله کچه منزوي پاتې شوې ده. قطر مخکې تر دې هم د طالبانو او لویديځ ترمنځ منځګړیتوب کړی دی.

آژانسونه: ش.ن/ ا.و.ا