آلکسي ناوالني کولی شې د درملنې له پاره آلمان ته انتقال شي
۱۳۹۹ شهریور ۱, شنبه
د جمعې په ماښام (د اګست میاشتې په ۲۱ نیټه) د آلکسي ناوالني، معالج داکترانو اعلان وکړ چې د روسيې د ولسمشر تر ټولو مشهور مخالف سیاستوال ناوالني کولی شي د ردملنې له پاره خارج ته انتقال شي.
د اُمسک د روغتون د اړوندې څانګې مرستیال آناتولی کالینیچنکو، دې ته په اشارې سره چې د دغه ۴۴ کلن سیاستوال جسماني وضعیت تثبیت شوی دی وویل: «مونږ کوم بل روغتون ته د ناروغ له لیږدول کیدو سره مخالفت نه لرو.»
د جمعې ورځې تر غرمې وروسته هغو داکترانو چې له آلمان څخه د آلکسي ناوالني د درملنې له پاره اُمسک ښار ته تللي وو، خبر ورکړ چې له هغه سره یي د ملاقات اجازه ترلاسه کړې ده او هغه یي معاینه کړی دی. دوی ویلي چې آلمان ته د آلکسي ناوالني د انتقالولو په برخه کې کومه ستونزه نشته. مخکې تر دې د کرملین چارواکو ویلي وو په هغه صورت کې چې داکتران آلمان ته د آلکسي ناوالني د انتقالولو اجازه ورکړي، د روسیي رهبري به یي مخالفت ونه کړي.
اوس د روسیې د اپوزیسیون د دغه پیاوړي سیاستوال وکیل د اروپا د بشري حقونو له محکمې غوښتي دي چې آلمان ته د هغه د انتقال حکم صادر کړي.
د ناوالني میرمن او خپلوان هیله لري چې د ولادیمیر پوتین دغه منتقد ډیر ژر برلين ته انتقال کړای شي. د برلین د شاريتې روغتون د ناوالني درملنې ته امادګي ښودلې ده.
۴۴ کلن آلکسي ناوالني حقوقپوه، مدني فعال او په روسیي کې د «له فساد سره د مبارزې کمپاین» بنسټ مشر او بنسټ ایښودونکی دی. نوموړی د روسیې د ولسمشر له شدیدو مخالفینو څخه دی او څو واره زندان ته تللی دی.
د آلکسي ناوالني ښځې یولیا ناوالنایا، ولسمشر ته د یو لیک په استولو سره آلمان ته د خپل میړه د انتقالولو غوښته کړې وه.
د زهرجنې مادې کشف
د اُمسک په روغتون کې د ناوالني معالجو داکترانو د جمعې په سهار ویلي وو چې د ناروغ وضعیت بل ځای ته د انتقالولو له پاره مناسب نه دی. دوی ادعا کړې وه چې ناوالني مسموم شوی نه دی، بلکې متابولیکي اختلال لري چې علت یي د وينې د شکر کمیدل دي.
د روغتون یوه مشر داکتر وویل چې د ناوالني پر جامو او پوست یوه کیمیاوي ماده موندل شوې، هغه ماده چې د پلاستیکي ګلاسونو او پیالو په جوړولو کې هم ترې استفاده کیږي. نوموړي ټینګار وکړ: «دغه ماده د ناوالني په وینه کې نه ده موندل شوې.»
له «فساد سره د مبارزې صندوق» سرپرست ایوان شدانوف وویل چې پولیسو داکترانو ته ویلي دي چې «وژونکې ماده» یي کشف کړې، هغه ماده چې کیدای شي ناوالني یي مسموم کړی وي.
ناوالني د پنجشنبې په ورځ د بد جسماني وضعیت له کبله د اُمسک روغتون ته ولیږدول شو او له همدې ورځې راهیسې په کوما کې دی چې د مصنوعي تنفس په وسیله ژوندی ساتل شوی دی. ناوالني د روسیې له پارلمان څخه دباندې د اپوزیسیون له مشهورو سیاسي څیرو څخه دی چې د۲۰۱۳م کال د مسکو د ښاروالۍ په ټاکنو کې یې تر ۲۷ سلنه ډیرې رایې ترلاسه کړې وې. تر اوسه پورې څو وارې پر دغه سیاستوال بریدونه شوي دي.