«د طالبانو سره د خبرو اترو څرنګوالی د هغوی په چلند اړه لري»
۱۴۰۰ شهریور ۲۳, سهشنبه
اروپايي اتحاديې ويلي دي چي بې له دې چي د طالبانو سره خبري وکړي، بله لاره نه لري. دا څرګندونې د دغې اتحاديې لوړ پوړي دپلومات او د باندنيو چارو د پاليسۍ مشر، جوزپ بورېل د سه شنبې په ورځ به شتراسبورګ کي د اروپا پارلمان ته وکړې.
هغه وویل: «موږ بېله دې چي د طالبانو سره خبري اتري وکړو، بل بديل نه لرو.» خو هغه اضافه کړه چي دا چي د طالبانو سره پر کومه سطحه خبري کيږي، دا به د طالبانو په چلند پوري مربوط کار وي.
د بورېل په وينا اروپايي اتحاديه به په دې ترڅ کي د بشري حقونو پر موضوع ټينګار وکړي. د دغه لوړ پوړي اروپايي دپلومات په وينا ښايي د طالبانو سره پر بشري حقونو خبره کولو جنجالي وي، خو په وينا يې دا هغه څه دي چي بايد له طالبانو وغوښتل سي.
يوه ورځ مخکي د آلمان باندنيو چارو وزير، هايکو ماس ويلي ول چي المان به د افغانستان سره بشري مرستي وکړي، خو دا به د طالبانو د په رسميت پېژندلو په معنی نه وي.
آ./ا.ا./ن.ز.